入到去就覺得好誇張，食物種類多到眼花繚亂，據講有超過150款韓式美食。我哋一坐低，第一時間直衝去醬油海鮮區。不得不提，醬油蟹真係新鮮到爆，蟹膏香濃得嚟唔會死鹹，連唔係蟹迷嘅朋友都話好正；仲有醬油蝦同鮑魚，都係韓國直送，啲肉彈牙又爽口。
之後就試咗佢哋嘅壽司bar，原本心諗韓式餐廳啲壽司可能一般，但原來幾有驚喜，細細件嘅壽司卷同軍艦選擇好多，連生牛肉紫菜卷都搵到，食落口感特別。
去到熱盤區更加誇張，基本上韓國街頭小食同地道菜式一應俱全：人參雞湯暖笠笠、泡菜炒豬腩肉夠晒惹味，仲有炸雞、炒粉絲、烤牛仔骨……一轉身又見到奶油蒜香鮑魚，香到我哋每人都拎返幾隻。食到後尾大家都講笑話，呢度根本係「香港版首爾」。
甜品區又係另一個驚喜，有窩夫、朱古力火鍋、雪糕，仲有韓國馬格利（青提子味）飲，酸酸甜甜好refreshing，perfect ending！
講返價錢，平日午市二百幾、晚市三百左右，以呢個選擇同埋水準嚟講真係算抵玩。雖然食到尾已經飽到行唔郁，但大家都一致覺得仲會再返轉頭。
1
