龍門冰室 (Closed)

銅鑼灣不嬲都有好多好野食，但而家香港發生左咁多事，就想收埋自己一個，唔想出街食飯，所以近呢兩個月都少左出去食飯，今次有朋友話想去銅鑼灣行街先出黎放鬆一下自己，行行下肚餓就就腳搵左一間餐廳食飯。朋友點左玉子燒常餐，佢揀左咸牛肉芝士玉子燒、叉燒湯意粉、牛油多士，非常豐富，$48就可以食到咁多野，真係好少地方可以薄薄嘅蛋皮包上足料咸牛肉，真材實料，啖啖都充滿咸牛肉嘅香味，非常惹味。玉子燒蛋皮煎得好滑lulu，好味。牛油多士，多士好厚身，而且仲去左邊，食落就會更加鬆軟，食落去外脆內軟，陣陣牛油香氣。叉燒湯意粉可以話係香港人嘅創意發明，肥瘦叉燒鋪滿意粉面，件件都原件，絕對唔會係叉燒絲，抵讚! 朋友叫左Latte 鮮奶咖啡，濃郁咖啡香氣，入口苦中帶甜，口感亦非常幼滑，估唔到冰室都可以飲到鮮奶咖啡，另類享受~我揀嘅精選晚餐，套餐中包括羅宋湯、多士同飲品，我就點左紅豆冰加$7，紅豆冰有好香濃嘅椰汁味，而且仲有好多紅豆，紅豆煮到岩岩好，唔會變左好似紅豆沙咁爛，必飲特飲之一。我地仲叫左蜜糖雞翼，雞翼上搽上一層蜜糖，入口就即刻品嚐到蜜糖嘅香甜味，無好油膩感，雖然係用焗嘅方法整雞翼，但雞肉仍然keep住嫩滑。