餐廳走中國風，主打傳統重慶小麵，主要做麵餐，三款組合三個價錢，分別係麵+飲品既$83，麵+飲品+小吃/甜品既$93，同麵+飲品+小吃+甜品既$103，設加一，價錢比大半年前黎略為加左價。另外可以再加料。飲品同小吃都可以加錢升級。麵可以揀乾撈麵或者湯麵，仲可以揀麻度同辣度。實在係太多野揀，自己剔紙就可以。餐廳都有提供缽缽雞、四川冰粉等正宗四川菜。
1
今晚我地每人叫左一個麵餐。
瘋狂豌雜麵
我鍾意呢款中式拉麵係有咬口既。叫左走辣，味道都好好，拉麵味道調得唔錯，每條麵都沾有醬汁，夠味，而拉麵本身係熱既。配料有滑溜好似薯蓉既豌豆蓉同埋調好味既肉碎，仲有兩條菜心。上面仲加左花生米、青蔥同榨菜等，提供唔同既口感。
番茄牛肉麵
估唔到四川餐館都有番茄牛肉麵食。番茄湯底超正，帶有天然番茄甜味，好開胃！牛肉超薄切有5塊，都嫩既，仲有兩條菜心，上面仲加左大量青蔥同香茜增强味道層次。
涼拌木耳 （跟餐）
餐牌寫住有兩隻辣椒，真係好辣。木耳份量唔少，仲伴有辣椒。
鐘水餃 跟餐+$32 另加一
鐘水餃一客六件，細細隻，不過塊皮好滑又夠薄，餡應該係豬肉碎，食落只係少少辣，其實帶少少甜味，好食。
熱羅漢果冬瓜茶，熱檸水 （跟餐）
熱羅漢果冬瓜茶主要係羅漢果味，唔過甜，好健康。熱檸水有兩片檸檬，味道正常。
有啲驚奇平日夜晚居然有唔少客。
