呢日行經洗衣街被印有「令和」二字嘅大紅燈籠所吸引，相信呢間居酒屋亦係開業不久，事關日本改年號都係唔夠一年嘅事。
牆身貼滿日本飲料同酒樽嘅標貼，亦有唔少動漫金句，充份展現當地文化氣息。
一入座店員隨即送上一小盤椰菜，可配以豉油食用，個人更愛原汁原味，新鮮椰菜自帶爽甜。
嚟得居酒屋當然要食燒物，選擇困難嘅可以揀拼盤，比單點更划算。
燒物火候控制得恰到好處，唔燶唔乾，金菇肥牛份量十足，裏住一大撮金菇，口感爽脆飽滿。
大蔥新鮮不老，無咩辣味，吸收咗豚肉嘅油份入口更香。
煙肉車厘茄大推
煙肉燒得乾脆不油膩，一咬落去車厘汁爆哂汁，酸甜清新嘅汁液充斥住整個口腔，一個字fresh
三色刺身價錢相宜，大塊又厚肉，質素唔差，吞拿魚雖然帶筋但無腥味。
丼飯份量對於兩個女仔嚟講啱啱好，口感偏淡，建議同醬油wasabi撈勻先食。
魚腩蓉滑嫩綿密，接近膠狀，相信係用機器打成，如果改以切剁口感應該會更有咬口:)
天婦羅炸得非常鬆脆，秋葵同和牛片嘅配搭幾新鮮，牛肉混和秋葵嘅黏滑濕潤，更能平衡炸物嘅油膩感。
呢杯藍蝶花梳打係餐廳招牌之一，絕對係打卡必點，旁邊嘅係檸檬汁，倒入梳打撈勻就會變色。
撈勻後紫中帶粉，好夢幻呀～～～
梳打無加多餘糖漿，入口清新微酸，一解進食肉類後嘅飽滯，嗝一口氣非常滿足。
