Chef Daruma

朋友生日想食壽喜燒+見到呢間有畫碟慶祝，所以決定揀呢間試下。

揀左個壽喜燒2人套餐，轉左A5和牛，但唔係噤好食，口感偏‘鞋’，唔需要專登加錢轉。另加左個虎蝦天婦羅，呢個唔錯，而烏冬係1人份量既細胃口下午茶迷你size，勁細份量，食壽喜燒時最好食既野食，其次牛舌都好食。

另叫左豚里脊肉（朴葉燒），職員擺好後無講低係點整，望住個細火，等左應該有超過45分鐘都未熟，之後問職員先知原來要不停加汁唔好俾佢乾身…結果碟野真係浪費晒，好‘鞋’好硬好咸（職員應該見到乾晒，所以淋左好多味噌汁落去），呢個直情覺得好難食。

蜜桃梳打好飲，多果肉，但建議可以換枝粗既飲筒可以容易啲飲埋果肉，又唔怕因為幼筒而俾啲果肉頂住飲唔到啲梳打。但係雖然好飲，呢柸野等左差唔多1個鐘先有，其間追過3次，係咪噤難整要整1個鐘先整到既呢？

整體黎講，天婦羅蝦可以，另牛舌同蛋糕好食，其他野食好一般，而且份量少，呢個價錢可以有更多更好既選擇。

坐位都迫，要用到爐既話，擺得爐，跟住每人一柸茶，每人再點一柸野飲後，啲野食根本無乜位擺。（不過唔叫唔會加茶，野飲又等得耐，其實啲野又偏咸，會口乾架囉）

慶祝想畫碟既呢間餐廳可以，真係畫得好靚，畫功一流，見到甜品上枱時真係會好開心。（不過上甜品前可唔可以清一清張枱，抹一抹張檯先…碟畫靚想影相打卡，但張枱污糟，真係唔知想點…）

另Openrice優惠：’慶祝生日或紀念客戶可以優惠價$98惠顧甜品即享免費寫字畫碟…‘呢句可以寫得好啲，‘免費畫碟’後面應該清晰點（可以加句視乎圖案可能需要額外收費）因為根本唔係免費（但明明openrice既評語都有特別圖案但又無額外收費），加上預約時職員通知要download app做會員先用得呢個優惠，即根本唔係屬於訂座優惠。