籽樂廚房 (Closed)

社企餐廳，幫助聾啞人士自力更生，咁有意義嘅餐廳當然要大力支持。餐廳環境闊偌，午餐時間都唔少捧場客，入座後店員會送上餐牌。因為有部份員工係聾啞人士，所以我哋要運用手語同佢溝通、落單，因為有餐牌嘅輔助，落單過程其實都非常順利，溝通係冇問題的。店員首先送上熱辣辣嘅蒜蓉包，份量比想像中多，一人可以食到兩大塊蒜蓉包。蒜蓉包脆卜卜，味道香濃，一向唔食蒜蓉包嘅朋友都大讚好食。今日嘅餐湯係南瓜湯，賣相不錯，湯底口感比較濃稠，有南瓜同埋奶香，味道天然，唔會太甜。豬手表面香脆，內裡啖啖肉，而且份量十足。豬手肉質香嫩，有油香，附上嘅黑椒汁黑椒味突出，味道香濃，令豬手味道更上一層樓，而作為配菜嘅炸薯仔都相當好食！無論口感定係味道都冇得挑剔，呢個質素黎講，價錢亦都算合理。另外我哋都點左一份魚柳配意粉，意粉撈味酸甜嘅蕃茄，開胃之餘，味道亦都唔單調，濃淡比例啱啱好。魚柳亦相當出色，外皮微脆，魚肉有經調味，食落有淡淡的香草味，兼保留左魚肉既原汁原味。魚肉嘅口感香滑，鮮嫩，即使唔蘸上任何醬汁亦已好夠味。以後黎尖沙咀，都會考慮多啲嚟呢間餐廳食野，一黎支持社企餐廳，二黎呢到這食物質素相當令人滿意！