All for One Cafe (Closed)

星期五晚同老公拍拖，Openrice 睇到附近一間新開嘅西餐廳，喺觀塘工廈區，開頭以為好難搵，但原來一出地鐵站隔離就係餐廳所處的工廈了，好近地鐵站，交通好方便。餐廳地方好大，佈置帶田園風格，座位都好舒適。餐湯係薯仔西蘭花湯配蒜蓉飽，將薯仔打成蓉，飲落有濃濃薯仔香味同質感，但唔會杰撻撻，好好味😋蒜蓉包都好脆。前菜小食升級咗哈密瓜拼巴馬火腿，平時食到既哈密瓜一般都係切成片，呢度係一個哈密瓜波波，食落好juicy, 清新感滿滿，夾埋巴馬火腿好好味。黃金脆絲蝦皮炸得好鬆脆，好開胃👍🏻煎封魚柳配薯蓉魚柳共有兩大塊，魚皮煎到金黃色，好香好脆，魚肉又滑又有肉質，問咗經理，原來佢哋係用盲鰽魚，魚肉結實好適合煎煮。慢煮牛柳紅酒燒汁配薯蓉牛肉粉嫩有牛味，好稔唔會韌，薯蓉食得出是新鮮攪拌的，不是用水溝薯粉嗰種，薯蓉份量好多，唔止一個雪糕球份量，係一大pat薯蓉，男士肯定夠飽。餐飲點左紅粉佳人特飲，係荔枝玫瑰梳打，顏色好靚，味道清甜，但唔會太甜，炎炎夏日飲呢款飲品，清新又解渴😋最後食甜品，點了薄荷朱古力Tiramisu 同咖啡Tiramisu 兩款，今餐好滿足！