烏冬有好多不同配搭，湯底已經有7款，而主菜配料又有10款，選擇都算全面。
調味料同天婦羅粒供個人喜好加落烏冬度一齊食。
我哋揀咗2款唔同嘅湯烏冬，同事叫咗<<赤>>日式醬燒肥牛烏冬，<<赤>>湯底係一樂秘傳蕃茄豚骨濃湯，湯底有淡淡豚骨加少少蕃茄味，唔係好濃嗰種湯底，肥牛惹味，烏冬彈牙，呢款湯底好清爽。
我就要咗<<黑>>日本產黑毛豚肉烏冬，<<黑>>即係日本黑蒜油墨魚汁豚骨濃湯，呢款湯底味道較濃，食到蒜香味，黑毛豚又淋又多汁，好味!
食完主食，就緊係到甜品時間啦! 2款甜品都包裝得好精緻。
我哋分別叫咗十勝紅豆宇治綠茶奶凍，啲紅豆大粒得嚟，但又好綿，奶凍嘅奶味好香濃，同時帶有微微綠茶味，整體感覺剛剛好，少甜好啱我哋。
另外就係沖繩黑糖蕨餅，蕨餅好軟熟，食到黑糖嘅清香味道，配埋灑面嘅黃豆粉，又係少甜，好清新。
最驚喜係喺食烏冬嘅專門店，都食到高質嘅甜品，而且店員都親切有禮，樂於介紹各款食品，同埋會主動加茶，下次行開都會再 encore!
