Mee...lemongrass (彩園廣場) (Closed)

今晚約左frd一齊去深圳，諗住上水去羅湖過關，去之前諗住食埋晚飯，見到呢間泰國餐廳係新開，而且裝修都好有異國風情，就一齊入去試下。見到menu，入面菜式價錢都正常唔算貴。首先叫左個小食拼盤，入面有五樣小食、雞翼、泰式鳳爪、蝦餅、春卷同串燒。雞翼同蝦餅整得好香口，加埋泰式甜酸醬好夾。串燒亦都好入味，加埋沙嗲汁岩岩好。另外，我地都叫左馬拉盞秋葵，少少辣幾惹味，份量岩岩好，兩個女仔都食曬。仲有海鮮喇沙都值得一試，幾足料有蜆、蝦同魷魚，有少少椰奶香，但如果個麵可以再入味d就更加好啦。最後點少得甜品，我地叫左芒果糯米飯同班蘭椰絲卷。芒果好甜加埋椰奶幾香，驚喜係班蘭椰絲卷，賣相唔算吸引，但班蘭cream加椰絲好香口，班蘭味都幾出。呢間如果住附近既街坊都可以一試，服務態度好好，見到店長同服務員都有問返客人意見，好用心。