Video
Read full review
2018-08-07
75 views
今日嚟到東京大眾酒場，餐廳喺正海港城對面，行完街過去食飯真係非常方便。同一幢大廈有好幾間食肆，最後選擇呢間居酒屋係因為見佢食物嘅賣相精緻，但又唔係貴到令人咋舌嘅價格，所以就上去試試。餐廳位於大廈4樓，打開𨋢門就見到大大個招牌，而餐廳門面設計亦有花心思，木色趟門加埋藍底白字嘅布簾，好有日式建築風格。入到去餐廳，枱櫈以深木色為主，牆上掛嘅布藝，甚至間隔用嘅板上，都係富有日本風格嘅圖畫。餐廳內電視播放嘅係日本電視節目，雖然我唔知佢講乜，不過亦因為咁，令我哋用餐時成個氣氛都好有喺日本居酒屋食嘢感覺。餐牌食物嘅選擇唔算好多，主打幾款食物，包括關東煮、燒物同壽司。我哋叫咗三款燒物、燒飯糰、關東煮一人前同埋芝士酒盗。Order完食物，嚟到居酒屋又點可以唔飲酒。我哋一人叫咗杯生啤，一邊等食物，一邊欣賞開放式廚房入面兩位師傅忙著製作食物。兩位師傅中，較年長嘅一位看似係日本人，外表認真得嚟帶點嚴肅。另一位後生d嘅似香港人，我見佢製作燒物嘅時候，都好專注。燒物類我哋叫咗燒鰻魚、梅紫蘇雞肉串同燒手羽先。燒鰻魚一串有兩件，鰻魚不算厚肉，但係肉質彈牙，醬汁甜度適中，而且唔會燒得太乾，咬落去都好軟滑。梅紫蘇雞肉串好
今日嚟到東京大眾酒場，餐廳喺正海港城對面，行完街過去食飯真係非常方便。同一幢大廈有好幾間食肆，最後選擇呢間居酒屋係因為見佢食物嘅賣相精緻，但又唔係貴到令人咋舌嘅價格，所以就上去試試。
餐廳位於大廈4樓，打開𨋢門就見到大大個招牌，而餐廳門面設計亦有花心思，木色趟門加埋藍底白字嘅布簾，好有日式建築風格。入到去餐廳，枱櫈以深木色為主，牆上掛嘅布藝，甚至間隔用嘅板上，都係富有日本風格嘅圖畫。
餐廳內電視播放嘅係日本電視節目，雖然我唔知佢講乜，不過亦因為咁，令我哋用餐時成個氣氛都好有喺日本居酒屋食嘢感覺。
餐牌食物嘅選擇唔算好多，主打幾款食物，包括關東煮、燒物同壽司。我哋叫咗三款燒物、燒飯糰、關東煮一人前同埋芝士酒盗。
Order完食物，嚟到居酒屋又點可以唔飲酒。我哋一人叫咗杯生啤，一邊等食物，一邊欣賞開放式廚房入面兩位師傅忙著製作食物。兩位師傅中，較年長嘅一位看似係日本人，外表認真得嚟帶點嚴肅。另一位後生d嘅似香港人，我見佢製作燒物嘅時候，都好專注。
燒物類我哋叫咗燒鰻魚、梅紫蘇雞肉串同燒手羽先。
燒鰻魚一串有兩件，鰻魚不算厚肉，但係肉質彈牙，醬汁甜度適中，而且唔會燒得太乾，咬落去都好軟滑。
梅紫蘇雞肉串好好食，雞肉燒得剛剛好，上面鋪上酸酸地嘅梅肉同好清新嘅紫蘇葉，食落去感覺好fresh 好醒胃，如果之後食得太飽，一定會再encore.
手羽先燒到金黃又有少少焦香，上枱時好香，食落外皮好脆，加埋少少鮮檸檬汁，味道Level Up!
個人認為燒飯糰係另一必點食物，我哋揀咗梅飯糰。飯糰外沾滿醬油再燒到外層結飯焦，真正外脆內軟！加埋飯糰內嘅梅子，酸酸地真係可以解一解油膩，隨飯糰仲附上一碗豬骨雞湯，我唔係好知係點樣食，就咁飲？定係點飯糰？朋友話用自己方式，於是我哋發現夾起飯糰點少少湯，又幾好食。又有一次因爲我唔小心將飯糰跌咗入碗湯到，於是又發現可能可以將飯糰混入湯到一齊食，變成坎飯！一個飯糰多重享受，好正！
芝士酒盜又係另一道無得輸嘅菜式，平時芝士酒盗得明太子，今次有埋海膽，底層仲有塊梳打餅。海膽嘅鮮味，混合明太子同芝士嘅咸香，送酒真係一流，梳打餅更加係有一個畫龍點睛嘅作用，配合以上三種食物嘅軟滑，脆口嘅梳打餅真係令個口感豐富左，真係好好食！
最後不得不提嘅係關東煮，蘿蔔非常入味，又甜又無渣，腐皮吸晒關東煮湯汁，入面仲包住隻蛋，造成一個小福袋！另外牛蒡卷同日本魚餅都係食關東煮不可或缺嘅食物。
食完嘢，職員好細心咁為我哋換過杯熱茶，每個職員都好有禮貌好細心。離開時更有一位職員幫我哋㩒lift, 服務貼心至此真係香港少見。
用心做好食物，用心服務客人，非常欣賞呢間餐廳！好期待下次再去！
Post
