金源小館 (Closed)

人越大越鍾意食下小菜添（唏噓～）金源冇外觀冇裝潢，地方唔大，但係門庭若市，除左食物質素之外，應該都係buy呢陣街坊味。山東燒雞（半隻）係呢度名物，侍應將燒雞上枱後先至淋上大量生蒜同醬汁，好澎湃。雞肉大部分已去骨，肉質幾腍幾滑，加埋甜甜地唔太鹹醬汁同少少辣的蒜粒，味道豐富，怕口臭者就自己衡量啦。上抽煎中蝦非常香口，蝦殻都炸脆左，送酒一流。啫啫油麥菜唔駛多講，好難唔好食。最特別嘅係，呢度的甜品（例如木糠布甸、焦糖雞蛋布甸⋯）都好多人話好食，拍得住甜品店。如果唔想破費，飯後都會送上糖水，有綠豆沙、豆腐花、南瓜露可選。雖然係送，但製作認真，起碼綠豆係煲到起沙、豆花都好滑。值得去指數: