陸金記瓜子大王 (Moved) New Location

今日出開灣仔，順道搵吓新開嘅<陸金記>；喺正電車路莊士敦道，隔離係涼茶舖<葉香留>。舖子細細，一眼睇哂！比較荃灣店還要細！ 除咗瓜子之外，仲有乾果、涼果、上海蛋糕賣。自從早幾年開始團拜，無人嚟拜年，媽咪連全盒都唔擺，懶得就懶！ 我哋又唔好食瓜子，所以好幾年無買瓜子嘞！今次，我都無興趣買瓜子，咦！有乾果呀！乾果係健康小食，值得一買！乾果包括：芒果乾、蕃薯乾、蕃茄乾、無花果乾、....結果，我買咗一包：蕃茄乾 $18 ( 半磅 )晚飯後，開嚟試吓！媽咪話咁紅嘅，唔似平時食到嘅蕃茄乾。一睇成份，加入檸檬酸等化學成份，恐怕媽咪唔啱食！我咬一粒，Oh! 酸味味，硬骨骨！既然加咗化學成份，完全唔係健康小食！ 算係涼果！閒來食吓無所謂！另外，店員話有些涼果可以試食，就算免費我都無興趣！臨走見到上海蛋糕，下次會買嚟試吓！