餐廳有兩層加埋露天座位，環境好闊落又好高級，尤其D五顏六色的燈籠，唔知以為去左越南咁，氣氛真係幾正! 餐廳仲有 Happy hour , 每日下午3點到8點指定酒精飲品有8折，就算同朋友或者拍拖都好啱去呢度!
食物方面，推介佢哋嘅越式生蝦刺身，用柑桔魚露汁拌得酸辣夠味，蝦肉彈牙又新鮮；
而鑊仔安格斯牛柳粒同烤牛骨髓嘅配搭非常夾，牛柳肉質鮮嫩多汁，牛骨髓濃香又肥美，配埋特調醬汁食嚟層次豐富。
會安烤乳豬係我女朋友最愛之一，乳豬香脆但唔會好乾，肉質軟嫩，好有口感。佢哋會整隻乳豬上枱俾你影相，然後先幫忙剪開，食落特別有儀式感。
煲仔飯都唔錯，香茅燒雞臘腸飯帶煙韌嘅雞扒加埋鹹香嘅臘腸煲仔飯，每啖都有飯焦嚟襯托，味道吸引。
甜品推薦越式濃縮咖啡雪糕，冰凍雪糕配上濃厚咖啡味，唔會過甜，口感順滑。
飲品方面揀左有特色嘅Bui Vien Espresso Martini，用舢舨冧酒混合越南咖啡同黑醋栗酒，味道細膩，非常適合想打卡嘅朋友!
另一款Lush就係用開心果醬搭配椰奶同紅桑子蓉，甜甜綿綿，好似奶昔咁滑!
