Chalet (Closed)

平時去荃灣都係食麵同糖水，好少食西餐。今日去開愉景新城，發現個頭有間幾有情調既餐廳，決定試下佢地既晚餐。餐廳以酒吧為主，燈色較暗，樓底高，好似有二層。可以選擇坐門口或者室內。整體感覺都算舒服。餐廳有提供單點同晚餐，我地就點左一個晚餐一個單點，分別係南瓜意大利飯同西班牙燒乳豬。前菜有燒帶子同雜菜湯。帶子唔會燒到好硬，雜菜湯夠濃味。由於個日客人比較多，所以主菜比較耐。中途我地加多個黑松露芝士薯條醫住個肚先。薯條好大條，好多芝士，好邪惡。大約20分鐘到，終於等到意大利飯，南瓜味好香，芝士唔會過多令到碟飯太膩，份量啱啱好夠2個食。過多陣乳豬都上碟，皮脆肉嫩，有薯蓉伴碟，配上燒烤醬，可以話有大師級水準！最後送上芝士蛋糕作甜品，有裝飾。由於個晚仲有節目，所以無叫酒飲，下次再黎一定會飲酒，我見到好多人叫黑啤！賣單5百幾蚊，係荃灣黎講算貴，但物有所值。