沐浴咖啡 (Closed)

今日約咗住天水圍嘅朋友食飯，佢介紹喺濕地公園附近嘅沐浴咖啡。餐廳環境非常舒適，以粉色為主色，好有少女情懷。當中有張枱係用放滿粉色波波同一隻黃色鴨仔嘅浴缸🛁，再喺上面鋪玻璃造嘅，非常可愛，好啱打卡用。另外，燈嘅外型好似泡泡🫧，能營造沐浴感覺。我哋叫咗兩個set dinner，有頭盤、主菜同飲品（餐跟伯爵茶，其他飲品需額外收費），甜品亦要另外收費。頭盤—蘑菇湯蘑菇味濃郁，口感厚滑，好味。主菜—香草焗原隻春雞配野菌汁 $168份量驚人，雞肉有鮮味，肉質細嫩，肉汁豐富，野菌汁香濃惹味。主菜—鹹蛋黃鮮蝦意大利燴飯 $138鹹蛋黃配意大利飯味道好夾，鹹香味令人一試難忘，意大利飯口感煙韌，大蝦鮮味十足！飲品—肉桂朱古力 斑馬🦓拉花好少見，造型非常可愛。朱古力味非常濃郁，熱辣辣，啱晒今日咁凍嘅天氣，幸福感滿滿。飲品—蘋果西柚奶昔 $58賣相吸引，朋友話水果味清甜可口，唔會似藥水。