燒肉 JuJu

Open Now

Now Closed

一人燒肉近年越黎越流行，剛剛去完日本仲好懷念，係旺角見到呢間「燒肉JuJu」，就一於緬懷下日本之旅。套餐有平有貴，豐儉由人，包飯、湯及泡菜/沙律，亦可以額外加點唔同嘅肉，想食乜就點乜。餐廳抽風做得唔錯，食完唔會成身燒烤味，檯面有各式各樣嘅醬料，配燒肉食一流。黑松露蒜蓉牛舌 : 本人好鍾意食牛舌，見到有牛舌餐就梗係要食啦。牛舌有四款醬可以選擇，我揀咗黑松露蒜蓉味，300g嘅牛舌份量相當多，薄薄嘅牛舌輕微燒過後已經可以食，入口爽口彈牙，散發出陣陣牛味，配埋香味十足嘅黑松露蒜蓉醬，味道濃中帶清新；套餐加8蚊可以轉紫菜飯，紫菜吸收肉汁後更加好味。A4和牛 + 封門柳 + 雞肉:一碟牛舌又點夠喉？再加咗A4和牛及封門柳各100g，A4和牛油脂分佈均勻，放入爐燒時已經聞到濃烈嘅肉香味，入口好濃牛味，非常鬆軟，絕對物有所值。封門柳略為厚切，雖然牛味唔及和牛，但厚切肉汁更多，$38黎講都幾抵食。除咗牛之外，仲點咗份雞肉試下，經醃過嘅雞肉好惹味，肉質鮮嫩，都算唔錯。