侍應叔叔嬸嬸都非常主動落力，招乎都周到，使得我受寵若驚，叔叔還懂簡單的英語能幫外藉食客落單呢。嬸嬸甚至企到門口拉客，十分認真，我都好耐無見過如此進取及敬業樂業。
香港地生意一年比一年難做，競爭激烈，舖租被大陸州民、自由行、水貨客炒至天價。每日一堆一堆低技術新移民湧黎香港，人力供過於求，所以薪金跟住下調，但政府走去搞最低工資及強職金，更百上加斤 ﹗人工無得加，但柴米油鹽樣樣加，車費、飯錢照樣加，點頂呀 ﹗香港淪陷後，慘不忍睹，見者傷心，聽者流淚，其實我都係其中一個受害者呢 ﹗
生龍從廣福道大街搬到內街，雖然多左閣樓雅座，但舖面十分夾窄，要用上迷你方檯，頂手頂腳。迷你卡位、迷你櫈仔，非常坐得不舒服，比小朋友坐就差不多 ﹗坐近門口熱到我滴晒汗，坐到最入貼住廚房都係好熱，坐係中間樓梯附近比較清涼，唔知樓上閣樓情況又如何呢？
四大名物，咖哩、茄湯、雲吞湯、牛骨湯牛腩，真的嗎？以前專注只做清湯腩，現在專營茶餐廳，菜色多樣化，蒸餸蒸飯、小炒小菜、炒粉麵飯、快餐雞牛豬扒加汁、等等。
凍齋啡走甜，水喉水味強烈，冰塊的問題嗎？腐乳通菜，通菜好爽好多汁但無菜甜味，全靠腐乳咸咸的味道。腐乳通菜，配上橡筋、粉絲、肥膏更好味？
咖哩牛腩飯大辣，牛腩普通無特別，碎濕濕不完整，味道清甜，質感滿意，彈彈滑滑亦無渣。咖哩汁港味濃，有大快活影子，跟印度咖哩差九里遠望塵莫及，巴基斯坦都稱不上！試過大埔咖哩至尊、油麻地阿龍咖哩先啦！係咪大辣黎架？只有小辣程度。
牛爽腩撈粗走蔥，飲幾啖清湯開開胃先。牛精味非常濃郁霸道，硬係假假地，不黏不膠，跟群記相差百萬里遠，可能跟撈麵的只給普通清湯掛，並不是牛骨濃湯。忘記了清湯腩無汁撈麵加喎，不像五香或柱侯呢，淋點清湯撈辣椒油食吧！辣椒渣微辣微香，掛在彈彈粗麵也不錯，不過腍又不粉不漿嘴的麵質，合格。爽腩味道極濃，甜味霸道，半肥瘦甜美可口。鬆軟綿綿而部份帶爽，色香味俱全，但欠缺膠質，滿意滿足，可以再幫襯呀 ﹗
花雕醉雞，酒味強勁加嗆喉，感受不到清香甜美。，砂冰醉雞有創意！一層肉一層冰，唔想浪費硬呑，牙齒凍到麻痺。可否給碗熱湯我浸浸呢？崩砂腩伊麵走蔥，雖崩砂腩不太崩砂，但滿分好好食，回味無窮！湯底超濃郁，牛腩漿嘴肉滑，讓彈滑嚥韌伊麵捲著鬆軟綿滑沙腩，大啖大啖塞進嘴裡去！暢快舒適無比滿足，不用辣椒油，原汁原味美妙極了！
粉葛湯，叫飯有例湯送，多謝。住家感覺揚揚，味濃清甜，絕對純天然無味精，趁熱飲無得輸呀！咖哩坑腩飯大辣，生龍供應既爽腩、坑腩、崩砂腩分別不明顯，款款都好似差無幾。只有爽腩明顯較多膠質，全部都非常軟綿綿，牛味甜美濃郁，肉汁澎湃可口，跟群記完全兩種風格，食到唔停口！
大辣咖哩充滿中東、印度香料味道，夠香夠辣十分刺激，溫度由胃散發再運行全身，額頭汗珠微滲，感覺良好，爽爽的！大大啖咖哩包著大大舊坑腩躺在大大堆白飯上，擘盡我的櫻桃小嘴塞入去，非常充實，好食到震﹗大辣咖哩辣度夠堅，好爽啊！
沙薑雞例牌，食完個咖哩牛腩飯隻雞先飛到！我真係等得不耐煩，心想撈咖哩汁自製咖哩雞，尊登留起少少白飯少少咖哩汁架！半暖半凍，沒有熱的感覺，估計因為要解凍再翻熱，所以遲遲未到。沙薑汁咸香可口，不過份不過濃，剛剛好。全熟雞髀肉滑溜彈牙，雞胸軟棉有咬口，不乾不硬又無渣，高質咸雞是也。
最初想飲紫菜牛骨湯跟蒸飯一齊上，肥姐突然端上美味香噴噴青紅蘿蔔豬骨湯，巧合地跟午飯碗例湯一樣，下次先牛骨湯啦！滾熱辣入口，真材實料清甜濃味熱燙燙，香甜味美無添加，那有不好飲的理由，即時一飲而盡好味道。
安格斯牛腩例牌，我問左兩次收銀肥姐有無落錯呢？最終都係錯，送上安格斯牛腩飯，激死我﹗我要淨食呀。四眼叔叔立即主動幫我跟進，唔該您呀。雖然非常微弱，但安格斯離不開雪藏味道，未能完全被醬汁淹沒。
牛腩質地似足五香肉丁，鞋硬中帶點點鬆化，味道悶死十分單調。淋上辣椒油再試，估不到肉質味道竟然同五香肉丁一模一樣，勁喎！墊底蘿蔔爽甜不酸，但去皮不夠深不徹底，舊舊都有皮渣咯。
荷香蒸籠仔鳳爪排骨飯，即叫即蒸，製作需時要耐心等候。新鮮熱辣送到，香噴噴的香蒜排骨氣味，荷香較薄弱。那麼大籠啊！白飯足夠兩碗，但排骨得一份乍喎，那夠送飯。仲有兩隻香雞鳳爪，我都專登同阿嬸講要淨排骨飯，唔要食鳳爪，死都要落鳳爪排骨飯，無您辦法。難食都要食，唔想浪費﹗超強而濃烈的雪藏味，瘦猛得層皮的雞腳，乾爭爭縮晒水喎，到底雪左幾多年？千年醃，咸到苦﹗不如唔好加鳳爪，格硬都無用，扣晒分！
排骨好得好掂好得，正正正呀﹗半肥瘦嫩滑彈牙，充滿肉香肉甜，汁液激射，醃味可口使到食慾大振！幾乎完全無骨，啖啖嫩肉無得頂！讓她躺在香蒜白飯上，惹味無窮，好幸福呀，我仲想食多幾啖呢！淋上豉油再食，極為失望！咸濁膩滯，甜豉油調得不好，即刻唔想食喇！唔撈好過撈，扒多幾啖香蒜無豉油飯先，好食好食。表層飯比較濕爛，跟下層乾爽飯撈均再食就好好多喇。
淨雲吞走蔥，好食過絕大部份以雲吞作招牌菜既麵家。熱騰騰送到，成粒啪一趙爆汁！灌湯雲吞結實不散，蝦仁鮮爽彈滑不腥不嗅不咸，豬肉香甜嚥韌，新鮮沒半點隔夜氣味或雪藏質感，連湯倒入口，絕頂美味。
爽腩河走蔥，似坑腩多過爽腩，欠黏膠爽脆。三種腩位分得不夠清晰，幸好高質滿分。彈牙的肉質，牛肉味濃厚，甜美肉汁每啖激射。就係依隻質地喇！烚得完整棉滑索湯，不散碎一氣呵成大啖啜，滿足到發夢都笑醒！掛埋大量辣椒油吸盡超濃牛骨湯，好食到使我欲仙欲死飄飄然！
荷香籠仔陳皮豆豉黃鱔飯，落單時姐姐已提示製作時間較長，無緊要，我唔趕時間。竟然一等就 30 分鐘咯，完全超出我想像。大量豆豉薑絲跟陳皮芬芳飄送，淋下淡醬油再將所有配料及黃鱔絲撈得均勻與蒸飯完全融合，禮成即起動！惹味豆豉黏黏，薑辣併陳皮芳香，清爽飯粒軟滑黃鮮肉，出住煙入口品嚐。蠻不錯的色香味，滿意稱心，還穩弱散發點點荷香。飯多多肉少少，邊夠送飯喎。黃鱔清掉，唯有辣椒油撈飯。香辣併重辣椒油跟豉油撈飯味道相襯，無餸食都使得我食多四五六啖飯呢！
牛清湯，不是普通的清湯喎，新轉的嗎？有著紅磡八寶清湯腩影子，有香料味有藥材味，特濃湯汁不單調，進步不少！牛肚撈麵走蔥走蠔油加腩汁，金錢肚炆得味濃入味，有著少少羶香，勁爽勁彈可口食多啖。幼麵長長極爽彈，一氣呵咸大啖啜就最開心暢快，趁熱快快食，放涼腩汁使到麵條有點咸呢。原計劃咖哩牛腩撈麵食，但遲遲都未送到，牛肚撈麵要專登留低一大半攤到凍晒喇！
咖哩崩沙腩大辣撈麵，有兩舊特別鞋韌既？師傅不是以為咖哩汁黑媽媽遮住，我條皇帝脷就食不出來嗎？普通牛腩肉來的。加入大量咖哩汁連牛腩跟幼麵大大啖塞入口，辛辣甜美爽彈軟綿樣樣有，百花齊放！食慾激增好好味啊，撈麵放涼變得有點過咸。咖哩崩沙腩大辣配油酥餅，熱到燙手油餅捲著牛腩享用，金黃焦香，嚥韌而油香出眾咸咸的，配辣辣咖哩惹味醒神齊鼓掌！
