同一條街開左幾間拉麵店，間間都派左條人龍出黎，行過Bari-Uma見到名字幾特別，人龍又好似短啲，於是決定一試。（入去無耐條龍極速增長，肯定係我旺丁）
入口側面見到一個個麵餅整齊排列，店內大大隻字寫住最強醬油湯，感覺特別又印象強烈。
落單容易，另外有圖menu簡約清晰。
檯頭有蒜粉、黑胡椒、辣粉同餃子汁等調味料。
炙燒豚肉海苔玉子拉麵
豚肉厚切，外表焦香，未上俾客人時一大舊用燈照住，確保送到客人面前都仲係熱。肉質淋到好似煲左好耐既豬軟骨咁，脂肪分佈平均，食落甘香滋味。
湯底醬油味好出，連雞湯都有好香既醬油味，形成強烈自家味道。湯由豬骨、雞殻、蔬菜等煲出濃厚豐富既香味，配上掛湯能力強既拉麵可以話係如虎添翼。店家對麵既硬度控制都有一手，硬同普通食得出有清晰分別，滿足到我既需求。
蛋煮到蛋黃少少熟，有流心效果。
女朋友既雞拉麵，湯底輕身啲，多左份雞油香味，鮮味更強。
餃子煎既時間落左層薄漿，上碟時有層脆脆跟住，唔厚所以好易咬開，餃子本身皮薄，餡料飽滿，味道一流。
炸雞外層蘇香，肉嫩多汁，配上蔥花入口味美肉香。
最後點左個芝麻雪糕作結。味道唔走甜到漏方向，芝麻香十足，仲食到芝麻粗粒，好有texture，加埋紅豆一甜一香非常配合。
