一直好想試下由鮨森前主管主理嘅立鮨，近排經過旺角分店，見到人龍又唔太長，二話不說就拉咗朋友去排隊。
我直頭係開左狂食mode，開大餐咁款！大概都食左十幾款壽司，有珍寶甜蝦、赤蝦、帶子、油金魚、火灸左口魚裙邊、火灸中呑拿魚腩壽司等等...
而以下係我覺得較特別又令我印象深刻的壽司:
鮮甜味系列
1. 三文魚子壽司($20)
三文魚子多到滿瀉，粒粒晶瑩剔透，咬落去鮮甜無比，絕無腥臭味，仲用咗柚子汁調味，味道格外清新！
2. 碎蔥吞拿魚腩軍艦 ($25)
呢呑拿魚腩軍艦並唔係魚蓉，而係切成有口感的碎粒。呑拿魚本身魚味淡，但魚碎中混有蔥花粒同柚子皮粒，加上少少白芝麻粒，癖除左魚腥味，食落零捨香。
3.原隻活赤貝壽司 ($30)
活赤貝係唔常見的刺身品種，呢度既赤貝超厚肉，又夠凍，口感爽脆，鮮甜味美。
濃味系列
1. 鰻魚壽司 ($15)
我覺得鰻魚壽司係全場咁多款壽司中最抵食！面頭用火槍辣過，聞起上黎已經陣陣飄香，下面既魚皮好肥美，脆卜卜，鎖住曬啲肉汁。
2. 蟹肉蟹膏軍艦 ($30)
呢款軍艦係期間限定的，蟹膏混入了麵豉醬，鹹鹹濃郁，蟹肉拆成一絲絲，實肉又有海水味，實在係濃味十足。
3. 火炙中吞拿魚腩壽司 ($38)
中呑拿魚腩大塊到見唔到舊壽司飯，師傅輕輕燒一燒面層，但仍然見到下面肉質色澤粉嫩呢。雖然味道都頗為甘香，但食落有些少筋呢。
4. 火炙大吞拿魚腩海苔壽司 ($48)
手握手卷，應該只係會係Omakase出現既壽司，所以有得平價食呢款手卷，一早已經mark實左會柯打！大toro果然油脂豐腴，食落淡淡油香，入口即溶，齒頰留香！
重頭戲之海膽系列
1. 海膽壽司 ($30)
我黎呢度既目的都係大擦海膽，平貴款都有叫！本身期間限定係有馬糞海膽的，可惜一早賣曬。
我先由最平個款食起的，$30食落似加拿大品種，味較淡卻厚身，但始終係平野，都唔可以預期佢會完全清甜。
2. 特上海膽壽司 ($48)
特上海膽似係用北海道貨源，味道比$30當然鮮甜得多，口感更細膩軟綿，份量仲多啲添，一分錢一分貨既道理。不過依然略嫌海膽不夠乾身。
3. 大滿足海膽特盛 ($98)
最後我實在抵受唔到誘惑，追加多個海膽特盛...大大啖每口都係海膽，滿足感up!
總括黎講，呢度可以話係以連鎖店價錢食到omakase質素，鰻魚、魚子、大拖羅、海膽會係我下次再黎既必食items！ 摸着酒杯底，配上鮮甜味食既壽司，企係度暢飲暢談，滿足了。
