GUM "JENG" (Closed)

之前睇雜誌知道“十八座狗仔粉”嚟咗呢度，拖嚟拖去，今日先嚟到。店員話狗仔粉改咗名“小白麵”但其實一樣，於是叫咗一碗。我冇食過狗仔粉，唔係好知咩嚟，但睇資料應該係尖頭尾，呢個好明顯係用刀切齊。食落腍腍地，好似豬油渣麵(其實我懷疑係同一樣嘢)，都幾入味，有啲冬菇、炸乾蔥做餸，我另外試咗個辣嘅炸乾蔥，有好淡孜然味道，都幾惹味。加多個流浮山蜜餞金蠔，$58有3隻大size。試過自己買比呢隻大啲嘅都要廿蚊隻成本，仲要煮同洗。食落冇過硬同乾問題，肉實淨蠔味都幾重，如果唔係用砂糖落蜜糖仲好。另外要咗支橙菠蘿黃椒果汁，黃椒味幾出，整體討好，但$38得250 ml略貴。睇餐牌仲有其他香港地道懷舊嘢，全店由拎嘢食到執拾採自助模式，而且黐住潮物店，行開可以去試下。