百樂小館 (Closed)

特色潮州菜有個朋友喺英國來港旅行，所以我哋今晚決定帶佢去試下香港嘅中菜，不過佢話來咗香港兩個禮拜，日日都食中菜，有少少厭，但係又唔想食西餐，於是我地上openrice睇咗好耐，最後我哋決定來尖沙咀美麗華呢間食潮州菜，特色D。英國朋友話佢未食過潮州菜，我哋一於就book位來呢度試下，一入到去裏面個裝修好靚、好特別，有幾張大大嘅圓枱，可以坐到十幾人，而且啲細枱都係梳化位，好舒適。一坐低待應就奉上兩碟小吃，啲小吃酸酸地，幾開胃，我哋因為好肚餓，都未叫嘢食已經食曬。我哋叫咗菊花嘅茶，啲菊花茶好香好香濃嘅菊花味。食潮州嘢當然唔少得鹵水鹅同凍烏頭啦！我哋各叫咗一碟，但係呢度除咗鹵水食物之外，仲有好多特色唔同嘅小菜。我最鍾意佢嘅鮑汁扣鳳爪，啲鮑汁味好濃，而且鳳爪煮得好林，入口即溶，仲有個脆盞菠蘿咕嚕肉，甜酸度適中，而且外面仲係有個香脆嘅雀巢，廚師做得相當出色。我哋叫咗好多嘢食，大家都好飽，但係甜品其實係有另一個胃，我哋仲一人叫咗一碗杏仁蛋白茶，估唔到呢度啲甜品先至係最出色嘅嘢，杏仁味香濃，而且唔會太甜啱曬我哋。