可能又有優惠，新店位置又近牛角，六點九去到已經要等三十幾張枱。最後都等咗成個鐘先入到去。大家都好肚餓所以就叫咗比平時多嘅份量。黃店就梗係要多支持啦！
藍莓乳酪好足料，淡淡都食到果肉，唔會太甜，但係如果成杯飲品涷多少少就好啦！
我地三個人食見到有三個帆立貝真係好開心。意粉煮得al dente，口感超級好。成碟意粉份量都多，又好掛到啲充滿洋蔥香味嘅忌廉汁。蘑菇雖然唔係主角但係份量都唔少㗎
小食拼盤份量比想像中多，每款都有4舊。上到枱全部種類都係熱辣辣。整體上隻隻都好食，自己排就(最好食)雞翼👉🏽豬肉腸👉🏽薯格👉🏽花枝丸👉🏽春卷👉🏽雞肉腸。
中間仲有千島醬同他他醬俾你配嚟食，當然都會俾埋茄汁啦！
Pizza就相對上差少少。主要係因為個餅底超級硬同乾。三文魚都有六大片嘅，但係呢個口味可能醬嘅份量都比較少，所以入口除咗會覺得乾仲會冇乜味(只有咸味)，可以唔洗試。
食埋個甜品先
窩夫份量超級大，係外脆內軟，算係厚實類型。中間嘅朱古力醬同兩球雪糕真係俾得好足，香蕉分量亦唔少。食完就勁飽同滿足啦！
整體上，食物分量大，材料都俾得好足，重點係有幾樣都好好食！我好耐都冇食過咁好食嘅連鎖店啦
今次有優惠所以平咗百幾蚊，係抵食嘅，但係以質素同味道嚟講就算冇折CP值都成正比。有下次
