德美壽司 (德民街)

Open Now

Now Closed

紅磡黃埔嗰邊一落到街真係好多嘢食，所以每次陪女朋友去到佢屋企附近真係有選擇困難症，唔知食乜好，不過女朋友就想食日本菜，佢成日都喺屋企附近嘅日本餐廳德美食飯，咁啱我又未去過，噉就試下啦。格局就有如一般嘅日式餐廳，今次我哋就坐咗吧台嘅位置，見住啲職員切刺身包壽司整沙律都幾過癮。回歸正題，三文魚同甜蝦都非常爽嫩新鮮。天婦羅蝦就鬆脆可口，仲有條炸秋葵添。草莓鵝肝多士。呢個非常推薦。多士烘得十分鬆脆。鵝肝嘅味道突出。再加上草莓醬個味道幾特別。牛油果軟殼蟹火龍卷。呢個又係另一件傑作。有好多薄片嘅牛油果鋪起壽司上面。軟殼蟹大件到根本個壽司都包唔曬，軟殼係食落非常之鬆脆，配埋蟹籽真係完美，真係好想再返嚟encore。喺呢度食飯，雖然性價比就未必有放題咁高，但有時唔想食咁多嘢，散叫的話德美其實都係一個唔錯嘅選擇。