我兄弟當中，有個無肉不歡，食素對佢來講係一定唔會飽，但係今次佢食完都對素食改觀（因為飽囉）。
我地叫咗素鵝，茄子，豆腐餃子，炒菜，麵，炒飯，當然仲有壽飽啦。（啲餸名唔記得咗，真係唔好意思）
素鵝係用腐皮做的，唔知點解食落真係有啲似鵝，仲要有鵝味。茄子係一般出面食到的茄子，所以無乜驚喜。豆腐餃子係個未食都要好好欣賞的菜，佢用豆腐來做餃子皮，好薄好靚；食的時候，有好重的豆味，讚。炒菜其實係麵條炒豆，佢用的好似係茴香豆，好少會係出面食到。
麵係擔擔麵，佢比出面食的好味啲，因為佢的麵質好啲，個花生醬味道剛剛好，唔會太搶，比起某某轉門食擔擔麵的餐廳仲要出色。炒飯係午餐肉炒飯，啲午餐肉好似真的咁，一啲都食唔出係素食品。
最後出場的係壽飽，佢無落蛋，但係啲蓮蓉都唔會＂行＂，油份好足，好食。
大家都好滿意呢餐飯，爸爸話下次食素都會來呢到。
