爆辣冷麵 (Moved) New Location

是日黎左爆辣冷麵買外賣，呢度個爆多蟹籽冷麵出哂名㗎，哈哈，爆辣都係出哂名添，辣度就真係量力而為呀～店在又一新城，呢個場無咩行，基本上黎親都係買外賣……最近仲多左雪糕賣，同貓星人crossover嘅產品，買冷麵加雪糕有優惠㗎。想方便食就梗係袋裝撈麵啦，早幾年好興，個個都拎住一包一路行一路食，但而加疫情要戴口罩，唯有買完企埋一邊食啦。呢度做緊15蚊/3包，平通街呀～爆荽蟹籽冷麵哈哈，想食呢個好耐，最近元朗各大食店都爭相推出芫荽產品，芫荽控表示開心～大量新鮮芫荽勁正，好香呀！！爆多蟹籽冷麵唔鍾意芫荽嘅朋友就食番原袓嘅爆蟹籽啦，蟹籽多到離哂譜，蟹籽多過麵，咬落係咁係個口到爆好感好正。爆辣小食朋友話想食就點左份，平時好少點呢樣，覺得淨食餸怪怪地感。原來又幾正喎，有獅子狗卷，蟹柳，腸仔，牛肚，水魷，大腸等，浸住辣汁好好味。全部都係叫小辣咋，有次試中辣真係辣到飛起，小辣就啱啱好，夠惹味，如果新手，建議先試蚊仔辣，哈哈。