天氣開始轉涼，就係最啱食啲暖笠笠嘅嘢！🍲 今晚同朋友去咗銅鑼灣覓食，無意中發現咗一間樓上嘅韓國餐廳，見到餐牌個海鮮鍋好似好吸引，就決定入去試下！點知有驚喜！🤩
🌟 韓國釜山海鮮鍋 (小) $398
我哋兩個人叫咗個細鍋，但個份量一啲都唔細！😳 一個金色嘅淺鍋裝到滿一滿，海鮮多到就快瀉出嚟！未食已經覺得好滿足！湯底鮮甜到不得了，飲得出係冇味精，飲完都唔會頸渴
入面嘅配料真係超足料：
* 大大隻爆膏花蟹 🦀️: 呢
個絕對係全晚嘅主角！隻蟹好新鮮，一打開個蓋，入面全部都係滿滿嘅金黃色蟹膏，超級甘香！蟹肉都好鮮甜，索晒湯汁，真係冇得彈！
* 彈牙鮑魚 & 大蝦 🦐:
估唔到個鍋有成幾隻鮑魚，口感煙韌彈牙，完全唔韌。大蝦都好爽口彈牙，食得出係新鮮貨！
* 魷魚、青口、帶子、蜆... 其他海鮮都好豐富，魷魚好嫩滑，青口同蜆都處理得好乾淨，冇沙。每一啖都係滿滿嘅海洋味道！🌊
個鍋仲有好多娃娃菜、金針菇同粟米，吸收晒個海鮮湯底嘅精華，最後加個麵一齊食好正
🌟 韓國柚子蜂蜜炸雞 (半份) $118
食韓國嘢又點可以冇炸雞！🍗 我哋叫咗半份柚子蜂蜜炸雞，老細講到明係用無激素雞，可以放心食，上枱時仲係熱辣辣，炸皮好薄好脆，就算淋滿醬汁都仲keep到個脆度！雞肉超嫩滑多汁，一啲都唔乾。個柚子蜜醬汁係靈魂所在，甜甜地帶點柚子嘅清新，唔會食到好滯
✨ 其他小食 & 甜品
坐低店員已經送上幾款前菜，泡菜夠爽脆，醃蘿蔔酸酸甜甜好開胃。最驚喜係有一碟炸魚皮，超級香脆，點少少鹽，係perfect嘅餐前小食！食到最後，店家仲送埋糖水，清甜滋潤
