The Mafe Cafe (Closed)

今日經過油麻地，想搵個地方靜靜地食餐午飯，做埋手頭上嘅工作，見到最近都有人推介mafe cafe，就自己一個人上去試咗呢間餐廳。嚟到呢度，一改我對樓上Cafe嘅刻板印象。以前成日都覺得Cafe好嘈，只係好多小朋友喺度玩board game。而呢度嘅樓底都算高，環境好寬闊，一啲壓迫感都冇。我點左一份黑松露野菌忌廉意大利飯。意大利飯有應有嘅煙韌口感，鍾意呢啲比較有咬口嘅飯粒，而且亦唔會煮得太過濕，剛剛好。黑松露嘅味道相當之清香，不過有忌廉嘅關係，難免會有少少飽肚。對於一位女士來講，一餐飯冇甜品點算係完美呢？叫左一份心太軟，朱古力雪糕筒心太軟蛋糕一熱一凍，形成強烈嘅對比。心太軟一切開之後，裏面嘅「岩漿」好似源源不絕咁湧出嚟，十分tempting！鍾意佢嘅朱古力濃度夠，又唔會太甜，啱晒我鍾意食甜品但又好怕太過甜嘅人。