本身對於魚生丼唔算超鍾意，因為好多時食晒魚生都未食完飯，要逼自己食飯咁，但聽講呢間好多料又好食，已經想試好耐
同朋友一人一個丼再加燒牛舌
丼既選擇唔算好多，但每款都好多款料，好雜錦，岩晒有選擇困難又多心既人啦
四重爆丼 $188
火焰魚生丼 $98
朋友點左招牌四重爆丼，望到海膽山都好吸引，海膽好鮮甜而且份量真係好多，滿滿既海膽真係好美味，所以呢個價錢真係值
我平時都好中意食火炙壽司，所以一黎到就揀好呢個火焰魚生丼，厚切三文魚好肥美，帆立貝大大粒，好鮮甜，燒過更好味
燒牛舌就不過不失，有點韌，要花點牙力先咬得開，哈哈
呢度重點始終係丼啦，見到仲有個鰻魚丼好多人點，係原條鰻魚，望落好好味，中意食鰻魚既朋友都可以試下啦
