燒鬼 (Closed)

今晚9:30同左一個平時都好夜收工嘅朋友上黎食燒肉刺身海鮮放題，本身店舖面積唔算大，有啲落簾嘅卡位，又有啲四人/二人枱，牆壁上有齊日式鬼神嘅圖案，令整體幾有「燒鬼」嘅感覺。食放題最緊要食得夠廣，我地今晚就試齊和牛、海鮮、蔬菜、壽司同刺身。前菜我地揀左泡菜豆腐同中華海蜇。豆腐非常滑溜，用酸辣嘅泡菜增加味道。反而海蜇就偏鹹。刺身方面，首先有榮螺片山葵漬，基本上就係螺片配Wasabi粒，好有咬口又帶爽，好正～之後上刺身拼盤，有超厚切嘅三文魚、薄切帶子、比較少見嘅鰹魚、每人兩隻鮮甜嘅甜蝦。壽司方面，係柚子醬油和牛壽司同明太子醬帶子炙燒壽司。和牛係厚切嘅和牛，啖啖咬口，半熟狀態帶出牛味。主菜燒肉用呢個好特別嘅架上，上小排肉、前胸肉、橫隔肌、牛腹肉。都係厚切嘅所以感覺啖啖肉，特別係上小排，油脂較多。仲有蝦、帆立貝、廣島蠔。侍應特別推介呢度嘅蒜茸，特別香，令海鮮增添口味層次。我就特別鍾意廣島蠔，感覺好有海水鮮味，燒得恰度好處嘅時候又有一份滑溜感。蔬菜有紫薯、雜菌。飽肚仲有三文魚茶漬飯，有啲熟三文魚碎，湯飯黎講都幾大碗幾飽肚。之後食埋Shake Up嘅雪糕，不過就有啲起冰。食燒肉當然仲有啤酒啦。