燒肉屋 (清風街)

最近餐廳推出全新放題套餐，120分鐘無限時任食燒肉同榴槤，豬牛雞海鮮、炸物、燒物、主食、甜點、飲品等，食肉獸同榴槤愛好者千祈唔好唔錯過～ 店內環境偏細，一坐低以為呃人嘅嗰爐咁迷你肯定食唔飽啦，估唔到火候幾大，而且食物即叫即上，食咗個半鐘都已經夠皮😂 大力推介榴槤，採用馬來西亞D24，上枱時未解凍，可以按個人喜好選擇即刻食、攤一陣再食、甚至乎燒熟佢！入口綿密，好甜好好味，仲可以搭配燒薄餅，連同貓山王榴槤蓉同雪糕，冰火效果，令人忍唔住一啖接一啖，自己一個都食咗成四塊大薄餅加唔知幾多嚿榴槤，真係不得之了。燒肉選擇好多，值得一讚嘅係有唔少款都已調味，醬汁洋蔥、果汁、黑椒、Mozarrella、韓式、蜜糖等，私心喜歡醬汁特選美國牛五花、果味醬汁五花肉，一聽就知係肥仔嘢，入口即化，薄身唔油膩，配飯一流、雞翼開埋邊，十分貼心、薯條味道鹹香，燒埋更加正，滿足嘅一餐。