其實之前已經做定功課，search晒睇晒openrice食評
見上海婆婆咁多人讚，一於就食呢間
點知，唔食由自可，一食把幾火
由於我地有5個人連小孩子，所以侍應安排我地坐卡位
但卡位張沙發竟然爛，塊皮裂開咗，但佢唔補番佢又唔換過張
感覺不良好，於是我地寧願坐普通位～
睇完好靚嘅menu後，點好晒嘢就等食喇～
之但係，相當大失所望
小籠包
一嚟到公主我就即刻夾，點知一拎起就穿咗漏汁，所以公主我食果隻變到唔夠汁
小孩子食果隻因為無穿底，就真係好多汁
但估你唔到竟然係相當厚皮都可以穿底漏汁，咬開個頂時仲feel到個摺口位啲皮係唔熟
而且小籠包嘅湯汁係無味咁，似有少少咸味嘅清汁，無鮮甜味
豬肉餡亦如是，亳無鮮味或豬肉味可言，只係知道自己食緊肉但唔知咩肉
婆婆粒粒炒飯
睇名就好吸引，但一嚟到覺得相當油膩
原來係用臘腸粒炒飯
其實臘腸已經油㗎啦，真係唔使再落油炒
而所謂嘅粒粒亦只有臘腸同蝦毛粒之外，唔多覺有咩其他粒粒囉
鍋塌豆腐
上海婆婆嘅豆腐係炸嘅，唔油但可惜個皮又厚又硬
豆腐亦無豆香味
最最最最最失敗係個汁，直頭係甜醬嚟
同公主我之前去過嘅南翔，簡直係蚊脾同牛脾，呢個真係超失敗之作
素鵝
叫咗咁多樣嘢係個素鵝係叫OK
只係OK，並唔係話好食
個外皮唔油又幾脆，但入面啲雜菌係真好不足囉
公主我食咗兩件，都淨係食到脆皮同一兩粒菇
唔知點解，間餐廳嘅環境相當昏暗（最近去過幾間都係咁）
不過可能間嘢唔爆，坐得都算幾舒服同鬆動
而侍應嘅服務算可以接受，都算有禮
但其實人客唔多㗎，點解我地食完嘢隻碟清晒都無人收
仲有侍應唔識主動睇睇要唔要加茶，要叫人先識加
總括：食物真係唔算好食（可能我咀刁啦），下次真係唔會再去！
