等位時順便睇下有咩甜品食，MOVENPICK任食，雪糕都有幾款仲有少見嘅榴槤雪糕。另一邊有幾個自製芝士餅／布甸及朱古力餅等，一陣可以食返兩件。
一坐低伙計即刻送上海鮮併盤，睇落十分豪華。有鮑魚／海螺／大海蝦／蠔以及成日俾人誤會係大眼雞嘅喜之次。雖然唔係得令時節但放題食到喜之次都算係咁了。
燒嘅時候加啲清酒去煮，除左令海鮮更快熟之外，酒香亦可以僻去海鮮嘅腥味，一舉兩得。
刺身拼盤仲有一板海膽，認真豐富。三文魚同油甘魚都肥美滑嫩，帶子及甜蝦都新鮮可口。可惜係吞拿魚有啲筋失左少少色。
和牛拼盤隨即趕到，唔同部位都標示清楚，方便食完第一ROUND之後揀選心水牛肉部位繼續食盡佢。
牛肉油花都均勻，肉眼及牛胸腹因為油花間隔得最均勻，燒時唔需要太留意火候。兩邊燒差不多三十多秒就剛好半熟，入口口感最好，肉汁仍然豐富有油香味。
兩款西冷／肋骨都偏瘦肉多，燒到七成熟會更好，肉香味濃唔需要沾太多燒肉醬汁就已經好好食了。牛舌厚切所以食起上黎口感十分滿足，加上燒起上黎勁多油脂火光紅紅咁，香味十分誘人。
之後都主攻牛舌／肉眼同埋牛胸腹，燒到半熟加少少燶邊，真係無得彈。
食到一半先醒起呢度酒類都係任飲，即刻攞返幾杯配燒肉。香甜加上少少酸嘅梅酒最啱配搭燒肉。
燒烤點可以無自細鐘意食嘅雞翼？所以都揀左啲雞翼／單骨雞肉腸黎燒，過下口癮。
最後加碼一個烏冬壓一壓肥同清下油膩感，食埋一早揀好嘅士多啤梨雪糕及芝士餅，清熱氣又可以去除油煙感，成餐就滿足地完成了。
