星期六同朋友去咗佐敦食晏傾嘢，大家傾到差唔多時間各自返歸。佢住附近，我問佢有乜加餸推介。佢二話不說就話即係斬料啦哈😆，並且推介試吓「陶園燒臘飯店」。
餐廳完全係街坊店，門面並唔起眼，亦無華麗嘅裝修，不過就有熱情嘅招呼。我其實只係喺門口望望，但老闆娘已經出嚟睇吓我有乜需要👍。
我要咗半斤叉燒同燒鵝下庄，望住師傅即場斬，保證唔會扣料，所以得兩盒都好重手啊🤘🏼。
燒鵝下庄($120)，屋企人好鍾意食燒鵝🦢，我見掛出嚟都幾靚，就買邊鵝髀食食佢。燒鵝皮脆多汁，鵝肉又香又嫩，我老豆仲話一食入口就已經分到係鵝定鴨。下庄有髀食🍗，但就無胸肉，噒骨為主。我認為呢度嘅燒鵝燒烤香氣特別強，好惹味啊。
叉燒半斤($64)，我嗌咗瘦叉🐷，因為怕食肥膏，但打開盒後有啲後悔，因為見好似有啲乾身。不過一食就覺得自己諗多咗，叉燒鎖住肉汁，肉質軟稔，甜度鹹度適中，份量足。
總括嚟講，我哋成家都滿意來自陶園嘅燒味🥢，小店出品絕對不比連鎖店遜色，價錢亦好正路，難怪店內坐滿堂食嘅客人！
最後，我想講門口隻燒鵝公仔著咗衫好鬼搞笑啊🤣。
