今日去咗銅鑼灣搵好嘢食，平時其實好少嚟銅鑼灣食嘢，就算食都係食開果幾間。咁岩上網睇到呢一間鋪頭叫做麻辣派對，一睇個名就覺得好正，於是同朋友黎試吓。因為我哋都好鍾意食麻辣嘅食物，而呢一間睇起上嚟都好似幾正宗。
上到嚟嘅時候覺得呢度啲裝修，都同出邊嘅麻辣火鍋店有啲唔同，呢度嘅裝修比較高級，而且感覺地方好乾淨，啲座位都比較闊落，所以一路打邊爐，一路同朋友傾計，或者傾生意，我覺得呢個都係唔錯嘅地方選擇。打開個餐牌，見到有各式各樣嘅火鍋選擇，有一系列係秋冬私房火鍋，除咗有最家常嘅重慶麻辣雞煲之外，仲有泡椒家常雞煲，另外仲有黑草羊腩煲，都係比較特別嘅選擇。但我哋就揀咗一個重慶麻辣雞煲。
除咗雞煲之外，佢仲有好多不同嘅小食，真係見到相都流晒口水。而我哋就揀咗一個香油海蜇，泡椒鳳爪，同埋爽脆生腸
。除咗雞煲有得揀不同嘅辣度之外，各色嘅小食都可以俾我哋揀不同嘅辣度，而我哋就揀咗小辣。侍應都有溫馨提示我哋，小辣都係相對會比較辣少少，諗住我哋食得辣嘅應該都OK 。
我哋叫咗半隻雞煲，兩個人嘅份量，而雞煲嘅味道都係十分濃郁，而除咗辣之外仲覺得好香。平時食雞煲最驚會令到件衫有好大浸雞煲味，但係呢一度竟然打完邊爐，食完雞煲件衫都唔覺得好臭。呢一樣真係值得一讚。
小食方面，海蜇十分爽脆，酸酸辣辣咁樣， 十分開胃。泡椒鳳爪感覺上好辣，對於冇食得咁辣嘅朋友來講，下次可以叫BB辣會比較好。但鳳爪都感覺上係用辣椒浸過，都好入味。爽脆生腸應該係咁多個小菜入邊比較冇咁辣嘅，都係比較醒神開胃。佢嘅小菜入邊都唔算太過油膩，因為有時出邊食一啲麻辣小菜，會見到大量嘅辣椒油，感覺上不太健康。
最後我仲叫咗一個好特別嘅甜品，叫做水中花，因為見到張相好靚，原來呢一個係一個薑汁豆腐花，除咗買相好吸引之外，味道都十分之好，下次再嚟嘅時候，呢一個一定要試吓。總括而言呢間餐廳質素幾高，可以同朋友或者三五知己再來
