Read full review
2017-04-26
3116 views
我成日都話朋友之間就係要常聯繫～ 難得友人P番香港，我就要把握時間襯佢飛走之前約下佢！update 大家近況～ 今次都係約去老地方「灣仔」覓食～我決定帶佢去灣仔蘭杜街既法國餐廳Odelice！ 試一試～ 至於點解會食法國餐？！因為我對法國餐係有情意結嘅～ 情意結嘅野～你懂的～講一下環境先～牆身以明亮的米色為主，綠色作輔助，沉色木製桌椅配合暗黃燈光，成個裝修唔複雜架！但就穩約透出優雅清新的格調，或者呢啲就係法國人天生既品味！餐牌內嘅圖片亦非常吸引，琳琅滿目，款款都想食～唔知點揀好～ 幾經一輪篩選～最後揀咗一個前菜，兩個主菜～ 甜品一陣再揀過～ Mixed Tartines Platter 雜錦塔丁拼盤 1. Parma ham 配香草芝士醬2. 風乾牛肉片配牛油果醬3. 三文魚配Cream CheeseParma ham 配香草芝士醬，咸香嘅薄切Parma Ham 加上口感輕盈軟滑嘅香草芝士醬放喺脆麥包上面，三者味道與口感都出奇地夾！好味！風乾牛肉片配牛油果醬，風乾牛肉片較其餘兩款遜色，肉味偏淡，作為主角嘅佢的確有啲失色，不過勝在牛油果醬味道出色，濃潤細滑，帶輕微Tabasco味道，非常
今次都係約去老地方「灣仔」覓食～我決定帶佢去灣仔蘭杜街既法國餐廳Odelice！ 試一試～
至於點解會食法國餐？！因為我對法國餐係有情意結嘅～ 情意結嘅野～你懂的～
講一下環境先～牆身以明亮的米色為主，綠色作輔助，沉色木製桌椅配合暗黃燈光，成個裝修唔複雜架！但就穩約透出優雅清新的格調，或者呢啲就係法國人天生既品味！
餐牌內嘅圖片亦非常吸引，琳琅滿目，款款都想食～唔知點揀好～ 幾經一輪篩選～最後揀咗一個前菜，兩個主菜～ 甜品一陣再揀過～
Mixed Tartines Platter 雜錦塔丁拼盤
1. Parma ham 配香草芝士醬
2. 風乾牛肉片配牛油果醬
3. 三文魚配Cream Cheese
Parma ham 配香草芝士醬，咸香嘅薄切Parma Ham 加上口感輕盈軟滑嘅香草芝士醬放喺脆麥包上面，三者味道與口感都出奇地夾！好味！
風乾牛肉片配牛油果醬，風乾牛肉片較其餘兩款遜色，肉味偏淡，作為主角嘅佢的確有啲失色，不過勝在牛油果醬味道出色，濃潤細滑，帶輕微Tabasco味道，非常惹味，單搽喺脆包上都非常好食
三文魚配Cream Cheese，面包內脆外軟，搽上厚厚嘅cream cheese，濃而不膩，奶香軟滑，非常襯肉質細嫩鮮美嘅挪威三文魚。
呢款前菜好好食～每一款醬都好好食！（重要嘅野要講幾次）每個包都搽上厚厚嘅醬，廚師一啲都唔吝嗇架！身為醬怪嘅我，比10個讚～ 哈哈哈～ 我個人特別推薦呢款前菜！當中我個人鍾意次序係：三文魚》Parma Ham 》牛肉
Tiger Prawns Linguine 虎蝦扁意粉
接住落黎就係主菜喇～ 我覺得意粉嘅精髓並非選用矜貴材料，而是在於意粉及醬汁。所以呢次要講嘅重點不在於虎蝦，在於個青醬及扁意粉。呢個青醬有清新嘅香草芳香，質感幼細，扁意粉煮得岩岩好，咬落去亦有嚼勁，掛醬力表現滿意，吃起來順滑。另外，個人建議，加點旁邊的鮮檸檬汁作提味，會有是神來之筆的效果。
Norwegian Salman Filler 挪威三文魚配羅勒醬
由於三文魚油脂豐富，煎過嘅三文魚，逼出豐腴魚油，入口寧舍甘香！而廚師亦特意將魚皮煎至金黃香脆，一口咬落去感覺驚艷，香酥脆口，不油膩！ 至於三文魚肉，入口亦鮮美，魚香佈滿口腔，只是口感上有丁點overcook，肉質有輕微偏乾，有少少美中不足，但so far 整體味道還是不錯。
因為煎香過嘅三文魚，味道香口濃郁，所以待應哥哥介紹我哋飲Merlot，既然待應哥哥介紹到，就試下啦。隻紅酒果味濃，無乜酸，有柔順不澀的口感，好易入口！雖然正常情況下紅酒係應該配紅肉，不過今次merlot 配香煎三文魚又ok wo, 配搭起上黎都唔突兀。所以配搭呢家野，真係唔使太拘泥於傳統，有時試下反傳統，可能有意想不到嘅驚喜。
黎到我至愛嘅環節「食甜品」～ 既然係法國餐廳，一定要揀crepe 食！我地揀咗煎香蕉、焦糖醬&雪糕班戟！首先講一下塊戟皮， 軟硬道恰到好處，證明小麥粉、水/奶比例剛剛好，質感軟滑煙韌！ 以前我喺屋企整過crepe， 都因為分量比例出錯，搞到塊皮過軟/硬。所以唔好睇少個皮，眼看簡單，其實係大學問黎架。
平時食既沙糖經過烹煮就會變咗焦糖，食嘅時候會發現甜中會帶丁點苦，不過加上odelice 自家制無防腐劑嘅雲尼拿雪糕、煎香嘅香蕉片以及軟滑煙韌嘅crepe，你會發現呢款crepe 無論味道及口感都平衡得啱啱好甜味適中，簡直係完美組合！
都因為佢地個crepe 好好食，所以決定追加多一款crepe！呢款都係焦糖，但就多咗拖肥杏仁～都因為多左拖肥杏仁，所以係味道上會偏甜～ 貫徹咗法國偏甜嘅口味。所以如果你係食得甜，絕對可以一試。
加入拖肥杏仁嘅crepe，你會發現除咗係味道上多左非常濃嘅拖肥味同埋杏仁香之外，喺口感上係多咗層次，每一口都脆卜卜，香脆不黏牙，甜入心嘅味道。
後記：我見餐廳經理、待應都會不時問一下客人既意見，了解客人口味，有無改進空間。又好熱心介紹菜式比客人，我個人感覺好好，感受到佢地真係好有heart好熱情去做好間餐廳。所以我鍾意去外國人開嘅餐廳就係咁既原因喇！
溫馨提示：我會建議book 台，因為我諗如果我唔係提早book 台 walkin可未必有位。因為琴晚星期2，晚上8點去到，餐廳係滿座架。基本上啲人一埋單走，待應一執好台無耐就會有下一台客坐，無間斷式。
Post
