斗記點心專門店 (Closed)

食物不過不失，但服務同環境就有待改善。一去到，喺門口企咗五、六分鐘都冇人接待，要主動行入舖頭問部長洗唔洗攞飛，佢話未有枱，坐入嚟等啦。入到坐，冇茶杯，我哋四個人，但攞得兩個杯嚟😰，又冇俾點心紙（後來發現原來係收咗喺枱上三角膠宣傳架入面，我覺得如果入坐時講聲會更好）。我哋叫咗蝦餃、燒賣、煎糯米雞、雪山叉包、叉腸、芝士蝦長春卷、煎堆仔、鳳爪、鳳爪排骨蒸飯、菜苗餃、牛肚、藥膳豬手、腐皮卷，食物大致上都唔錯，但冇話好驚喜，但嗰個「本期推介」藥膳豬手就唔多掂，湯冇乜味之餘啲豬手仲更加冇味，似係未夠火候，所以唔入味。環境方面，坐位layout比起 一點心、添好運等點心專門店闊落，員工亦冇催客人食完就快啲埋單嘅感覺👍。但店內温度真係唔講得少（我哋坐門口第一張枱）雖然頭頂就係冷氣出風口，但因店門長開，所以全餐飯一路出汗一路食😖（雖然已向部長反映，但佢只係將玻璃趟門半柵，但有客人出入後便冇員工跟進，由它繼續打開，其實當我親自去將門完全柵上嘅時候，冷氣係OK的）總結：食物可以，但未覺突出，服務方面，希望能多由顧客需求方面出發。