茶聊

Open Now

Now Closed

趁住公司返半日，放工之後同同事一齊去食飯。已經嚟過好多次間餐廳，每次嚟都依舊覺得好靚好有親切感。今次一出𨋢口就見到精美裝飾，好有節日氣氛。今次點咗lunch 金蒜牛油煎虎蝦配鹹蛋黃忌廉汁手工意大利粉同埋皇牌牛肉漢堡配頂級西班牙伊比利風乾火腿、凱撒沙律及薯條。今次係第一次試鹹蛋黃忌廉汁，鹹蛋黃味並冇喧賓奪主，食落依然係忌廉做主角，慢慢至帶出鹹蛋黃既香，配埋爽口彈牙既虎蝦，令成碟意粉口感更豐富。點餐既時候揀咗皇牌牛肉漢堡先分兩份，方便share嚟食。塊牛肉厚身又多汁，配搭埋芝士、洋蔥粒、番茄同生菜，更係滋味無窮。另外仲有厚身薯條同新鮮沙律，食完好飽好滿足。熊仔咖啡可愛又好味，熊仔係雪凍咗既咖啡冰，所以即使溶咗都唔會令咖啡味道變淡，好貼心！熱紫薯鮮奶好幼滑，而且帶有濃郁紫薯香味。