無肉食 (My Central) (Closed)

一直都支持無肉食，今日特登嚟到中環分店。秉承一貫優雅平實的室內設計風格，宜人的環境，實而不華的食物。大約12點不算太多人，繳費後便自行入坐，先食沙律，有我十分喜愛的皮蛋及大荳芽，加上辣椒調味，十分醒胃。熱葷都比較大路，有陳村粉，粗炒或牛河，蔬菜有苦瓜，勝瓜，冬瓜，節瓜粉絲，真係所有瓜都出齊。今次陳村粉就一般般，因為黏埋一舊舊，口感麻麻。熱葷中最推介係蕃茄蛋，顔色靚又好食，蕃茄唔係煮到諗哂出水，咬落去有得咬吓之餘又有酸甜味。另外椰子紅蘿蔔素海都好好飲！甜品中的紅豆沙夠料，可惜就太甜，要自行加熱水沖淡，糕點似大菜糕質地，我個人則喜歡以前在北角店食到的較煙韌有咬口的熱糕點。整體食後感，冇太大驚喜，但以$88價錢食一頓舒適的午餐，不失為一個好選擇！