首先飲兩盅燉湯，杏汁豬肺湯同埋羊肚菌松封行笙花菇菜膽燉湯，非常真材實料，好滋潤，好清甜。
蜜汁西班牙叉燒拼燒腩仔好精緻，一時就知係靚肉，肉質、調味、火候、賣相都係100分。
紅燒乳鴿皮脆肉嫩，多汁香口。
乾炒九肚魚河粉可以話係驚艷，河粉非常有鑊氣，炒得好乾身，味道豐富得來唔會太鹹，令人最難忘嘅係九肚魚，估唔到炸咗嘅九肚魚個質感同河粉係咁夾，呢個係下次嚟一定要再食。
食到飽晒之後食甜品，本身對甜品期望唔係好高，點知真係好飽都成碗食晒，生磨蛋自杏仁茶係滑、香、滋潤，陳皮紅豆沙有好香優質陳皮嘅香味，糖水起晒沙得嚟又有一粒粒完整嘅軟奶綿綿紅豆，大推！
