金饍韓國料理 (Closed)

今日終於都試到呢個韓式燒肉，望哂維港景而且肉類質素好高，勁滿足。呢個景望出去係文化中心，好靚而且有種居高臨下既感覺，好chill。一嚟已經有前菜，辣辣地開下胃而且都係菜類食多咗都唔會滯。日式雜菜沙律沙律比起想像中再大份，有切碎同埋再調味，酸甜口感加上爽脆既生菜，食完更加開胃。店員表示每人加25蚊可以任飲，冇可能唔加啦，一般汽水有齊另外仲有珍珠奶茶，荔枝烏龍茶等少有既飲品都有。珍珠奶茶好特別好岩我口味，記得要攞粗飲管!基本上飲兩三罐已經回到本醬燒特選牛肋骨呢個一定要叫，店員會首先成條牛肋骨俾你睇下有冇錯，然後就會厚切成好多片。肉質好鮮嫩就算面頭燒到燶燶地入面都係好軟淋，牛肉味非常突出。基本上2分鐘就已經食得，真係好好食。櫻花豬五花望落都切得好均勻，燒完一啲都唔肥，肉質夠嫩而豬味都好濃。鹽燒羊鞍有3大隻羊鞍，唔會太羶，肉汁都保留到同埋本身調味都夠，但想再濃味可以加喜瑪拉雅山海鹽，層次再豐富啲。海鮮煎蔥餅呢個真係趁熱食，餅皮好脆而海鮮平均鋪滿，加上佢提供既辣醬令到口感同層次都好突出。金饍豆腐煲辣味十足而且豆腐好滑，再加上有牛肉絲，有咬口又好飲，可以中和到肉既油膩感。