每間餐廳都各有千秋，花多眼亂，最後我哋揀咗對住天台花園嘅Honbo，久仰大名但一直未有機會食，難得荃灣亦有分店，當然唔能夠放過。
餐牌設計簡約，漢堡嘅選擇唔少，除咗有招牌嘅手打牛肉漢堡之外，仲有素肉漢堡、炸雞漢堡同備受好評嘅炸蠔漢堡。
由於限聚令嘅關係，我哋買咗外賣去對出嘅天台花園用餐，店員喺每個紙盒上面標籤好食物內容，非常細心。
炸蠔漢堡相當有驚喜，難怪呼聲咁高，炸得酥脆嘅鮮蠔放喺厚厚嘅椰菜絲上面，配上明太子他他醬，和風味濃！
日式炸蠔尺寸中等，即叫即炸，入口蠔味鮮濃，而且毫無油膩感，加上椰菜絲切得超幼細，口感清爽，成個組合配搭得宜，先生食完亦讚不絕口！
招牌漢堡有兩層牛肉漢堡、芝士、酸瓜同洋蔥，係最經典嘅漢堡組合，不得不試。
牛肉漢堡係自家手打，入口肉汁香濃，加上酸瓜同洋蔥增加口感，係最完美嘅經典滋味。
薯條同樣即炸，略為粗身而且炸得非常香脆，份量亦算多。
飲品方面有幾款比較常見嘅罐裝汽水，值得一讚嘅係店員用廚房紙包好保冷，非常貼心。
餐廳食物非常有水準，特別係炸蠔漢堡，配搭好有驚喜，難怪一直大受好評！假餘嚟紗廠行一轉，感受下休閑慢活嘅氛圍，順帶享受一下美食，絕對係一件樂事！
