嘩~ 無敵價!!!
實收$42蚊一客/免茶芥/免加一....(咁抵食??)
半個鰂魚涌人的我, 見到定價少過五十蚊 --- 仲要唔駛加一有碟"有肉食"的飯真係覺得大驚小怪~ 話說有間茶記, 已經將價錢一加再加/加到貼在門口廣告位的午餐A-F要$56元一客, 今年年頭開始, 食SET包飲品的餐牌想要"有肉食"都難, 以前都有雞脾意呀/香茅豬扒飯呀/男人浪漫火腩飯呀咁...已經全部不在 Set Lunch之內, 非常齋! 要有肉呀, 散叫啦~ 咁計法飲埋嘢就起碼$70蚊落樓) 無計啦, 土起問題, 地主大晒, 香港人食地租好似係老馮咁.
招牌菜
餐牌在牆上一目了然, 簡單清楚
招牌葱油香烤雞扒飯, 睇見個名已經想食, 而小寶說: "要吃蛋蛋" (咁樣? 晚市至有肉鬆蛋喎...) 唯有硬著頭皮問一問師傅仔可否加錢加隻煎蛋. 師傅仔好好人, 說"係咁意加兩蚊"煎隻蛋給我們問好嗎? (當然感激說好!)
好老實講: 正常要返工的閒日, 食慣閒閒哋收五/六十幾蚊一碟垃垃圾圾鰂魚涌飯的我, 今日心情原本有點恍恍惚惚, 見到這碟盛惠四十四蚊這個模樣的飯放枱的一刻真有點精神一振而隨後有點感動... 看到胃口大開, '扒多兩啖飯', 好食!
食物方面: 雞扒處理得好, 無鞋拾拾乾爭爭, 外觀當然靚仔, 葱油香, 好味! 煎蛋呢~ 好久沒見過有咁靚燶邊蛋的出品了 (個邊不是真的燶, 意識形態啫...), 一上枱我真是流口水, 飯量正常, 都夠飽, 跟餐有飲品, 我要了樽庄烏龍茶因飲唔晒方便邊行邊飲. 另一碟是雙拼豬手飯, $42元, 我沒吃, 所以在此我不評了.
1
環境方面: 我只給3星, 是今天唯一要扣分的地方. 是店舖位置的問題非關他們的事! 對正大日頭 - - -七月份正午的大太陽真是熱得人都癲! 整間鋪滾熱辣有冷氣都唔太夠涼, 由入店開始, 我已經周身滾熱辣流晒汗, 自動攞把手提小白電扇出來散熱但都熱爆標, 其間我見師傅仔已經自動波去開多部冷氣並且再調溫, 我們沒出聲但我知他已盡力處理, 謝謝你! 
當然隔好一會才開始有少少降溫, 所以有點點可惜, 當然, 我本人特別火, 怕熱所以有此意見, 其他人可能無我咁誇張! 總之如不是有此問題的話, 我會給以5星星作完結! 冬天來就PERFECT!!
服務方面: 師傅仔並非那種笑面迎人的人, 但他態度恰當, 而那份細心及體貼真是沒話說, 令我們很滿意!
價錢方面: 我只能說是午餐無敵價!!! 以這個價錢有如此食物質素的一份靚靚午餐真是食完番尋味, 正!
[可惜我這個鰂魚涌人只有返鰂魚涌慢慢'嘆' (嘆息個嘆呀, 唉~)]
今時今日出品如此精又好吃看得出肯用心的小店子買少見少, (垃垃圾圾/又貴坐得又迫但爆晒場的就大把, 鰂魚涌最多!
) 雖則時間唔夠用都要花心機寫一寫給店子打打氣! 大廚小館: 笑面! 
