榮哥廚房私房菜

Open Now

Now Closed

好耐冇食私房菜，估唔到觀塘都有間，見近近地去試下，要預早幾日訂位，選定菜單放在枱上，好清晰，今日叫了三個人的私房菜餐，前菜係涼伴黑白木耳，本地水耕沙律菜，茶燻味流心蛋配秘製醬汁的酥脆茄子，賣相一流，流心蛋好香甜，蛋白醃製了茶燻味，好入味。中菜唔少得湯水，有兩款包括清甜潤喉的哈蜜瓜螺頭黑毛豚肉湯及滋潤的川貝陳皮海底椰鱷魚肉湯，好清甜，尤其係哈蜜瓜。另一道係中蝦球水芙蓉，有隻又爽又鮮的大蝦，蛋白好滑，面層有甘荀汁，好甜。香煎北海道帶子海中寶，聽落海中寶個名都好吸引，面為手打蝦膠，中間仲巧妙地釀入巨大帶子，帶子鮮味還好突出, 肉質好彈牙，澳洲大蘆筍黑松露醬炒鮮百合，黑松露味香噴噴，以蔬菜菌類為主，有清甜蘆筍、鮮百合、黃色雪耳, 所有材料釀入小南瓜內，南瓜肉好清甜。清菜有超清甜湯底的菠菜，還有大紅大紫炒飯， 夠晒飽肚。甜品方面係流心黑芝麻湯丸，湯丸皮煙韌，流心的黑芝麻蓉夠香甜，無懈可擊的一餐, 色香味俱全。