Nakamura Tokichi Hong Kong Ten

早幾年開店嘅時候已經嚟過一次，當時人氣非常旺盛，淨係等位都講緊起碼要大半個鐘頭時間，雖然無論環境同食物都非常吸引，但係諗起要等真係怕怕。
今日喺美麗華行街行到有啲攰，同朋友商量不如去中村藤吉睇下，好彩今日人唔多，終於可以逃脫排隊厄運🙏🏼
餐廳內部裝修非常日式，空間感好大，窗外嘅風景都好空曠，感覺好舒服。侍應會喺每一台都放置茶壺，裝住佢哋嘅自家焙茶，茶香撲鼻，邊飲邊食甜品非常夾。

丸十芭菲  [抹茶]

$98

丸十芭菲之前已經食過一次，仍然心思思想再食，面頭用抹茶粉整咗鋪頭嘅logo，賣相相當精緻。最頂層係忌廉，然後順序有抹茶蛋糕丶抹茶寒天凍丶抹茶雪糕丶脆米丶白玉丶紅豆蓉同紅桑子，配搭非常豐富，每一層都敲動住抹茶控嘅心😍必試！

生茶啫喱 [抹茶]

$88

生茶啫喱茶味好重，加上奶味偏重嘅抹茶雪糕，係最完美嘅配搭。旁邊有紅豆蓉同白玉，紅豆蓉入口甜蜜，質感綿滑🥰加上玉子煙煙韌韌增加口感，matchy matchy!
食物除咗價錢略貴之外真係無懈可擊，可惜都係未有機會一嘗每日限量嘅嶡餅，唯有比多個藉口自己下次再嚟😉