碗屋 (Closed)

十幾年前已經認識碗屋，一試難忘，佢一直都係只此一家，10月份惠顧有八折優惠，所以今日同老婆嚟慶祝生日🎂😋。.訂位時話慶祝生日，廚師就會準備一個迷你壽司蛋糕。我哋叫咗個魚生拼盤，件件魚生都好鮮味，仲要係厚切，數量亦非常足夠。另外要推介嘅係燒鵝肝。鵝肝有成1cm厚，香味撲鼻，外脆內軟，入口即溶，油甘豐富，超正靚鵝肝。釀蟹蓋（甲羅燒）亦係必定要食。日本松葉蟹膏釀蟹蓋，蟹膏上面加咗些少鮮甜蟹肉，味道濃郁，滋味非常！ 串燒魷魚筒除咗個樣趣緻之外，亦十分鮮甜，加上秘製燒汁，令人要再三order來回味。老婆鍾意食燒羊架，當然要點啦！羊架帶有淡淡羊羶香味，肉質鬆軟嫩滑，入口即溶，味道極之好。炸生蠔、燒雞軟骨、燒大蝦🍤樣樣都香味撲鼻，要臭一陣先捨得食😆。日式燒金芋又係喜出望外，原來燒番薯時在上面灑少少鹽，可以提升番薯甜味及香味。其他推介有海膽手卷、拖羅手卷、燒鮮帶子、日式蒸蛋、豆腐雪糕、綠茶雪糕。最開心係放題由6:00開始，無限時，我哋兩口子食到10:00，可以慢慢品嚐每一口食物。