聯發牛什粉麵茶餐廳 (Closed)

身為街坊食客幫襯過無數次，但無下次，人生第一次買外賣買得咁難堪。長話短說，我叫咗兩個湯粉外賣，遞咗張單俾一個呀姐，外形短髮矮小帶鄉音。等左約2分鐘，我走過去問係咪攞得，呀姐面帶笑容叫我等等，因為湯粉分開上會分袋裝，我仲笑笑回響好。當時除我以外，見唔到有其他人等外賣。過左1分鐘，同一個呀姐「叫」我過去攞外賣，於是我去攞，走之前我專登再問多次係咪已經攞得？佢答我係。當我上左條電梯，隱約見到入面碗嘢唔我要嘅嘢，我又急急腳跑返去，天真以為係呀姐無心之失，換完就無事。點知到咗門口，同一個呀姐瘋狂鬧我自己無聽清楚就攞搞到拎錯野，連番責罵，而另一個男外賣客正是等緊我拎返黎，佢不停講算啦算啦都攞返黎啦無事啦，但呀姐繼續鬧我無聽人講清楚擅作主張。真妙，可能當時出現左兩個時空，而呀姐堅信自己個腦有講得清清楚楚明明白白吧。我一直以來都支持小店，但好失望，原來有一間食店係咁樣做生意，希望大家引以為鑑。