The Beef & Leaf (Closed)

身為柏宇粉，佢有份投資的小吃店點都要撐下。The beef & leaf藏身係新興的旺角中心1樓食街，鋪頭細細，只有好少空位畀你企係度享用。佢主打漢堡，特色在於個包唔係一般漢堡包，而係中式饅頭，同埋手打澳洲牛肉漢堡扒。供應的漢堡大約十種，都幾有特色的，例如芒芒饅頭、咕嚕饅頭等等，我第一次試，叫個穩陣d嘅好了。流心半熟蛋饅頭（$46）限量供應，印上店logo的饅頭脹卜卜，加埋漢堡扒、菜、番茄、芝士，賣相係唔錯，但搵極都唔見隻蛋，原來係藏左係漢堡扒裡面。雖然有兩層包裝紙，仲有個盒，但因為太滑又太多料又多汁，一咬d餡就開始走位，d汁仲沿住我手臂流下，搞到好狼狽。撇除呢樣嘢，整體係幾好食嘅，尤其塊漢堡扒好juicy，調味亦夠，個饅頭夠晒鬆軟，好似咬緊叉燒包咁。有食評嫌佢唔夠大個，但我覺得作為下午茶剛剛好了。