Video
Read full review
2020-10-19
105 views
住西貢嘅親戚， 帶咗我去食廚師發板，佢話之前食過覺得好似去咗日本旅行咁， 一定啱曬我喎哈哈。 間餐廳係位於白沙灣酒店，有部分嘅枱係望到海景，我諗日頭去食嘅話， 如果天氣又好，絕對係一個享受，望住個咁靚嘅海景食好嘢。入到餐廳， 師父就好有禮貌同我哋打招呼， 第一印象良好。 間餐廳好乾淨， 有吧檯有細房， 我哋被安排坐喺吧枱，可以睇到師傅製作食物， 為今餐增添趣味。 越嚟越期待今晚嘅廚師發板! 呢度嗰張餐紙都好靚，我仲用手摸下個紙嘅質感 ，連一張餐紙都做到一絲不苟， 我已經想像到將整得靚靚嘅食物放上去， 一定會好襯。我同親戚望下menu， 一人套餐由九百蚊至千四蚊， 我哋揀咗千二蚊嘅廚師發板， 有三個前菜，五款刺身， 炸物， 五款壽司，湯同埋甜品。等待食物期間，飲下呢樽來自日本嘅白神山地之水先，感覺個水非常純淨，好清， 大大樽絕對夠你成餐由頭飲到尾。 同埋呢度講明烹調食物嘅水都係用呢隻水㗎， 連呢啲細節位都做到咁執著同追求完美，真係抵讚 。首先嚟到嘅係前菜，有炸白飯魚， 燒銀杏，同埋沖繩水雲菜。 個炸白飯魚係由好多魚仔喺一塊紫菜上面整成嘅，香脆可口，非常之合適做前菜。個燒銀杏完全冇苦澀味㗎
間餐廳係位於白沙灣酒店，有部分嘅枱係望到海景，我諗日頭去食嘅話， 如果天氣又好，絕對係一個享受，望住個咁靚嘅海景食好嘢。
入到餐廳， 師父就好有禮貌同我哋打招呼， 第一印象良好。 間餐廳好乾淨， 有吧檯有細房， 我哋被安排坐喺吧枱，可以睇到師傅製作食物， 為今餐增添趣味。 越嚟越期待今晚嘅廚師發板!
呢度嗰張餐紙都好靚，我仲用手摸下個紙嘅質感 ，連一張餐紙都做到一絲不苟， 我已經想像到將整得靚靚嘅食物放上去， 一定會好襯。
我同親戚望下menu， 一人套餐由九百蚊至千四蚊， 我哋揀咗千二蚊嘅廚師發板， 有三個前菜，五款刺身， 炸物， 五款壽司，湯同埋甜品。
等待食物期間，飲下呢樽來自日本嘅白神山地之水先，感覺個水非常純淨，好清， 大大樽絕對夠你成餐由頭飲到尾。 同埋呢度講明烹調食物嘅水都係用呢隻水㗎， 連呢啲細節位都做到咁執著同追求完美，真係抵讚 。
首先嚟到嘅係前菜，有炸白飯魚， 燒銀杏，同埋沖繩水雲菜。 個炸白飯魚係由好多魚仔喺一塊紫菜上面整成嘅，香脆可口，非常之合適做前菜。個燒銀杏完全冇苦澀味㗎，覺得呢道菜幾特別。 沖繩水雲菜，第一次食呢樣嘢， 酸酸地又滑滑地咁， 上面有啲山芋絲 ，係一道開胃嘅前菜。
之後先嚟兩款刺身 ，就係北海道牡丹蝦同埋北海道帶子。 睇個蝦頭就知隻蝦好大隻，帶子都係厚切㗎，切開咗一半都仲係咁大粒。侍應特別介紹個透明豉油，話冇咁鹹之餘又會提升鮮味，真係好有趣呀。我第一次見識透明豉油，當食材點咗豉油，唔會有豉油嘅痕跡，而食落口又會有豉油嘅味道， 真係帶我去咗另一個境界咁! 師傅建議點咗wasabi 再點透明豉油， 而唔係將wasabi放落透明豉油度。 牡丹蝦肉爽口鮮甜， 而帶子飽滿又甜，啖啖肉，兩者絕對係新鮮嘅食材!
接住嚟嘅係三個刺身， 分別係金目鯛、 黑睦魚( 有炙燒過) 同埋北海道生蠔附和風汁。
金目鯛肉質帶少少爽口，魚味都幾香濃，好正。
黑睦魚因為有灸燒過，未食已經聞到香味，連埋皮食，真係一絕!
北海道生蠔勁巨型， 口感creamy，比較綿，佢同和風汁又幾夾喎，食到咁大隻生蠔超滿足。
下一道菜就係炸物啦，有三款，分別係櫻花蝦蔬菜餅、本菇同埋蕃薯。
呢份炸物我最鍾意就係櫻花蝦蔬菜餅，佢裏面有櫻花蝦、甘筍同金菇。 本身甘筍同金菇炸過其實已經香，再加埋櫻花蝦嘅海鮮味道， 令到成個蔬菜餅嘅美味更上一層樓。 個炸物炸得啱啱好，裏面仲保持住蔬菜應有嘅濕潤。食炸物記得加少少竹炭鹽，會變得更加惹味㗎。 呢個蔬菜餅好大件㗎，真係食得好滿足。
至於番薯，佢本身都好香甜， 即使炸咗都掩蓋唔到本身嘅味道。 至於本菇，外面香脆入面仲保留到菇嘅質感，而且味道都唔錯。
下一道就係五件壽司。 本身我好鍾意食壽司㗎，所以都特別期待呢一part， 師傅會一件一件壽司咁上，同埋細心留意住你食嘢嘅進度去準備下一件壽司。 所以你每一件壽司，都係即製咁，啱啱幾秒前先製作好。
首先嚟嘅係深海池魚王， 肉質少少爽口，有好清 、香濃帶甜嘅魚味，勁正! 第一件已經咁好食，極級享受。
第二件係金線鯛， 即紅衫魚， 呢件壽司火灸過 ， 肉質比起第一件係比較綿，都幾有魚味， 火炙過令佢嘅魚香突出咗。
第三件係燒左口魚邊 ， 本身油脂比較豐富， 肥美。師傅話要趁熱食， 講得冇錯， 保持到佢嘅熱度，差不多入口即溶， 果然唔可以錯過佢最佳嘅食用狀態!
第四件係拖羅 ， 唔使講 ，拖羅一定係比較肥美。一食落口，近乎入口即溶，鮮甜又勁香， 食佢嘅時候完全係一種超級享受， 而且食完之後， 齒頰留香，魚油嘅香味喺口入面久久不散。
最後一件，北海道海膽。 呢個海膽同平時喺一般香港壽司舖食嘅唔同，佢嘅味道好清，帶有海水味，質地軟糯，非常鮮甜，感覺係冇雜質好乾淨好清澈嘅海膽! 勁鍾意! (我見到呢個海膽係由一個木盒裝住， 係嚟自北海道，真係喺同日本食冇分別㗎)
食完幾度咁有驚喜， 衝擊住味蕾嘅美食， 好似食到有啲飄飄然嘅感覺哈哈，係時候食番啲清啲嘅嘢。 呢個時候上返個淺蜊清湯就正好， 碗湯入面有三隻淺蜊， 完全冇沙，個湯正好可以中和一下口腔嘅海鮮味，感覺好好嚟得合時。
最後就係甜品時間 ，係兩款甜品，蘋果煎茶果凍 (師傅建議食先) 同埋黃豆粉蕨餅連十勝紅豆。
個果凍有好香嘅蘋果汁， 質地有少少似桂花糕 ，我自己本身好鍾意咁清甜嘅甜品，真係再食多啲都唔會覺得膩。
個蕨餅幾煙韌， 非常柔軟， 好好食， 上面嘅紅豆味道清甜， 啱啱好唔會過甜。 兩款甜品為呢餐廚師發板劃上完美嘅句號。
呢餐真係非常難忘，成個套餐好似一首優美嘅樂曲咁，有前奏，有澎湃嘅時刻，有高低起伏，最後不失優雅地完結，絕對係頂級享受! 而且呢一餐你唔好睇佢啲嘢細細件，其實係超級飽，建議留肚嚟食，唔好浪費咗一份咁豐盛咁有心思嘅晚餐。
同埋值得一讚嘅係呢度嘅師傅，好有禮貌同友善。除咗介紹嘢食，提示你食邊樣先，仲會問你嘅食後感想。 見到佢哋處理食材非常乾淨， 啲魚生海膽全程都有蓋蓋住， 師父仲好頻密咁清潔砧板同廚具，衞生值得一讚 。
另外呢度嘅洗手間空間非常充足，超級衛生，個廁所係日本嗰種自動馬桶，連厠紙都係質地非常之好嘅。感覺呢間餐廳係每個細節位都做得好好 ，會令客人覺得一餐嘅消費係非常之值得。
當我離開餐廳嘅時候，我覺得好似啱啱喺日本旅行完返香港一樣，有種唔捨得嘅感覺啊。
好開心可以喺度食到一餐咁頂級嘅廚師發板。
Post
