Golden Bowl

行完觀塘工廈之後本來諗住搵啲簡單嘢食，最後就揀咗金飯館試下佢哋成日被人推介嘅炒飯系列。基本上佢哋好多菜式都係用炒飯做底，選擇多到有少少眼花。
原本想叫豬扒飯，不過見到隔離枱堆到成座山咁高，為咗稍為收一收口，我最後揀咗蝦頭油炒飯。炒飯炒得好乾爽，入面有蝦仁、櫻花蝦同少量蠔，但就算淨係食飯本身都已經好夠蝦味，非常惹味。我另外加咗蘭王蛋，價錢唔算平，但食落覺得效果一般，可以唔加都無所謂。
飲品方面，凍檸茶係普通茶餐廳版本，勝在茶味夠重、冰唔算多，整體都算穩陣。
之後同朋友交換試咗黑松露炒飯，入面混咗少少帶子粒、蝦仁同白菜，但黑松露味唔算突出，相比起其他幾款炒飯會普通啲。
再嚟係即炸豬扒燶邊蘭王蛋飯。呢款係少數包埋蛋嘅飯，豬扒炸得好脆又厚身，分量同樣誇張，但椒鹽味太突出，直接搶晒戲。
椒鹽豬扒飯都係炒飯底，份量依然澎湃，豬扒係偏向避風塘風格，香口又惹味，如果鍾意重口味會食得好開心。
至於脆皮牛腩飯就比較特別，炸皮本身好食，牛腩肥瘦分佈都幾好、炆得軟，但同炸皮一齊配炒飯感覺有啲奇怪，整體味道唔算太夾。
最後我哋七個人叫咗七個飯都係清唔晒，分量真係誇張。老闆一路都好熱情同我哋傾計，之後先知原來最低消費唔一定要一人一個飯，聽到都忍唔住笑。