潮福蒸氣火鍋 (Closed)

早前出去深水埗買充電線，經過黃金商場見到有間酒樓有任飲任食火鍋，同老公都肚餓就決定入去食，店舖位於商場一樓，上到去望到店面都好開揚，左邊有一大個魚缸放海鮮，侍應安排我地入座及遞上點菜紙，平日時段每位$240，已包醬料及加一，每人仲包1份海鮮拼盤、安格斯牛肉及脆皮乳鴿半隻，其他嘢食飲品任飲任食。湯底我地選了鴛鴦鍋，海鮮拼盤包括龍躉件、桶蠔、扇貝、鮑魚、海蝦及蟹，由於老公唔食海鮮，全部變成我的囊中物！海鮮放清湯底，其他食物放沙嗲湯底，特別一讚是龍躉件和鮑魚，新鮮夠彈牙！乳鴿即炸送啤酒是絕配！安格斯牛肉一般沒有牛肉味！另外仲叫左炸魚皮、鵝腸、芝士腸、支竹、娃娃菜，鵝腸爽脆沒有腥味，老公大讚好味，最後加多一碟肥牛和娃娃菜就投降了，飲左4支嘉士伯抵返。